Президент бул иш сапарынын учурунда бир нече өнөр-жай ишканаларын ачып, өлкөдө саясий стабилдүүлүктүн натыйжасында айлык акы, пенсияларды көбөйтүүгө мүмкүнчүлүк түзүлгөнүн белгиледи. Айрым байкоочулар президент менен болгон жолугушууларга атайын даярдалган гана кишилер чакырылганын айтышууда.
Жалал-Абат облусунда адам укугун сактоодо көйгөйлөр арбын. Укук бузуулар саясий, социалдык-экономикалык чөйрөлөрдө катталган. Бул тууралуу адам укугун коргоочулардын 16- майда өткөн кеңешинде кеңири сөз болду.
Оппозициялык Бириккен элдик кыймылдын Жалал-Абат облусунда жүргөн штаб башчысы Азимбек Бекназаров аймактагы кабарчыбызга алдыдагы президенттик шайлоо, чек ара, эл турмушу, маркум Дооронбек Садырбаевди эскерүү, БЭКке жасалган куугунтуктар тууралуу кеп салып берди.
Жалал-Абат облусунун губернатору Кошбай Масиров 12-майда Өзбекстандын Анжиян облусунун акими менен жолугушуп кайтты. Бул жолугушууда кыргыз-өзбек чегиндеги Чек айылына байланышкан маселе да козголгон. Сүйлөшүүнүн жыйынтыгы боюнча облус башчысын аймактагы кабарчыбыз кепке тартты.
Бийлик саясатта кыйла кемчиликтерди кетирүүдө. Жерлер сатылып, кадр саясаты аксоодо. Компартиянын Жалал-Абат облустук комитетинин 1-катчысы уюмдун Бишкекте өткөн курултайында бийликтин мүчүлүш жактарын сынга алды.
12-майда облус губернатору Кошбай Масиров баштаган топ Анжиян облусунун башчысы менен жолугушуу үчүн Өзбекстанга барды. Облустук бийликтин өкүлү анда чек ара маселеси каралбай тургандыгын билдирүүдө. Ноокен районундагы Чек айлынын тургундары тагдырына арабөк караган кыргыз бийлигине нааразылыгын айтууда.
Бул талаш делген жердин башы ачыла электе өзбек бийлиги аны өзүнө каратып алып, чек ара бекетин орноткон. Чектиктер ал тосмолорду алып салууну жана айылдын кайсы өлкөгө таандык экенин чечүүнү талап кылышууда. Алар өз укуктарын коргоо өтүнүчү менен кыргыз бийликтерине кайрылышты.
Кыргызстанда жазгы талаа иштери кызуу жүрүп жаткан кез. Эгин-тегиндер түштүктө дээрлик айдалып бүтүп калса, өлкөнүн түндүк аймактарында айдап-себүүлөр эми башталып жаткан жерлер да бар. Ошол эле учурда жаз аяктап жатса да, айрым жерлердеги айдоо аянттары иштетилбеген бойдон калууда.
Базаркоргондук Назым Мамадалиев Өзбекстандын түрмөсүндө каза болду. Аны туугандары милициянын ур-токмогунун уусунан каза болгонун ырасташууда. Өзбек тергөөчүсү өз кезегинде кыргызстандык жарандын оорудан көз жумганын айтууда.
Жалал-Абат облусунун «Винсовхоз» айлында 6-майда нааразылык жыйыны болуп өттү. Жыйындагылар депутат Жусупжан Жээнбековдун ишкер уулун издөө ишине канааттанган жок. Алар Бактыяр Амиражанов табылбаганы үчүн ички иштер министри Молдомуса Конгантиев менен улуттук коопсуздук кызматынын жетекчиси Мурат Суталиновдун кызматтан кетүүсүн талап кылышты. Жээнбековдун баласы 1-июнга дейре табылбаса, Көокарт-Жалал-Абат автоунаа жолун тосула турган болду.
Жалал-Абат облусундагы бийлик сынчылары Бакиевди президенттикке кайра көрсөткөндөр жаңылууда, анын заманында эл турмушунда оңолуу болгон жок деген ой-пикирлерин жайылтып жатышат.
30-апрелге караган түнү Өзбекстан Ноокен районундагы Чек айлына өзүнүн чек ара бекетин орнотту. Пахта-Абат районунун акими Чек айылы Өзбекстанга караштуу деп элге жарыя кылды. Мындай аракет эки өлкөнүн ортосундагы чек ара жайлары делимитация боло электе жасалды. Чек айлынын тургундары Өзбекстандын куралдуу жоокерлерин чыгарып кетүүнү талап кылышты.
Жалал-Абат облусу чек ара, суу ташкын, жер көчкү, жер талаш жаатында көйгөйлүү аймак. Облус губернатору Кошбай Масиров «Азаттыктын» суроолоруна жооп берип, президенттин Жалал-Абаттагы туугандары тарабынан көрсөтмөлөр боло элек деп билдирди. Анын ишениминде президенттик шайлоого жергиликтүү бийлик кийлигишпейт.
Кыргыз-өзбек чегиндеги Чек айылында соңку күндөрдө өзбек тараптын үстөмдүгү күчөп, андагы кыргыз тургундары үчүн кооптуу жагдай түзүлдү. Өзбек чек арачылары үйлөрдү тинтүүгө чейин барган соң айылдын эли кыргыз президенти Курманбек Бакиевден укугун коргоону өтүнүшүүдө.
Бүгүн жер көчкүдөн каза тапкан аксылык он алты адамдын сөөгү жерге коюлду. Набыт болгондорду акыркы сапарга узатууга катышкан мамлекетттик катчы Досбол Нур уулу жабырлангандарга керектүү жардамдын баардыгы бериле тургандыгын билдирди. БЭКтин штаб жетекчиси А.Бекназаров бийлик кырсыктын алдын алалбай жаткандыгын сындады.
Аксы районуна караштуу Райкомол айлында көчкү алдында калган 16 адамдын денелери толук табылды. Ал жерге барган мамлекеттик катчы Досбол Нур уулу жабырлануучуларга бардык жардам берилерин айтты. 17-апрелде көчкү курмандыктарынын сөөгү жерге коюлду.
Кочкор-Атада кары-картаңдар баш паанек кылган пансионду шаар бийлиги тартып алган жатат. Пансиондон чыгарылса кайда бараарын билбеген карылар май айында нааразылык акция өткөрүүнү чечишти. Алар үй-жайсыз, багар-көрөөрү жок, мүмкүнчүлүгү чектелген адамдар. Өп-чап пенсиялары жашоого жетпейт. Шаар башчы Кочкор-Атада тартыш болгон балдар бакчасына пансион ылайыктуу экендигин билдирди.
Жалал-Абат облусундагы лидер аялдар ассоциациясы ички эмгек көчкүндөрүнүн социалдык абалы тууралу маселени талкуулады. Анда айтылгандай, элетте жумуш жок, тапкан маянага жашоо кыйын болгондуктан эмгекке жарамдуу адамдар шаарлар менен Бишкек жана Чүй бооруна барып иштешүүдө. Орун-жай которгон ички эмгек көчкүндөрү социалдык женилдиктерден кур калып, балдары билим-тарбиядан өксүп жатат.
"Ата Мекен" партиясына Ноокен, Базар-Коргон, Сузак райондорунда бийлик митинг өткөрүүгө уруксат бербей, ар түрдүү тоскоолдуктарды жасашууда.
Аксы районундагы Кара-Жыгач айылында 2002-жылы болгон кандуу окуяны эскерүү митинги болуп өттү. Анда алты адамдын өмүрүн кыйган күнөлүүлөр табылбастан, элге ок аткандар менен ага курал колдонууга буйрук бергендер жаза албай жаткандыгына нааразылыктарын айтып, президент Бакиевдин кызматтан кетүүсүн талап кылышты.
Дагы жүктөңүз
