Жогорку Кеңеш бүгүнкү сессиясында өкмөт сунуштаган мыйзамдарды январь айындагы күн тартибине киргизген жок. Бул өкмөттүн жаңы курамы бекий электиги менен негизделди. Учурда өкмөттүн курамы качан сунушталаары, Конституциянын 30-декабрда кабыл алынган жаңы редакциясына качан кол коюлары бүдөмүк бойдон турат. Парламенттин тагдырын чечүү максатында 30-декабрда башталган Коопсуздук кеңешинин отуруму ушул аптада уланары болжолдонду. Саясий күчтөр да президент баштаган аткаруу бийлигинин кезектеги жүрүшүн күтүү ыңгайында турушат.
30-декабрда кабыл алынган Конституциянын жаңы редакциясы ушул аптанын башкы көйгөйү болду. Майрам күндөргө тушуккан бул окуянын айланасында талкуу уланган жок, саясий чөйрө апта бою күтүү ыңгайында турду. Талдоочулар болсо саясий кырдаалдын курчуп кетүү ыктымалдыгын болжоп жатышат.
Быйыл өткөн жылдагыдай март ыңкылабы өңдүү дүйнө коомчулугунун көңүлүн бурган саясий чоң окуя Кыргызстанда катталган жок. Бийлик менен оппозициянын тирешүүсү, парламент менен президенттин бир пикирге келе албай коюшу, анын айланасындагы талаш-тартыштар жыл этегине чейин ырааттуу уланып келди. Бул жылы «Реформа үчүн!» кыймылына таасирдүү саясатчылардын тобу баш бириктирип, алар бийликке каяша айтып, апрель, май, ноябрь айларында үч ирет массалык митинг өткөрүштү. Анын тыянагы Конституциянын жаңы редакциясынын чукул кабыл алынышын шарттады.
Кочкор аймагында болгон жер титирөөнүн кесепеттерин жоюу тууралуу бүгүн Жогорку Кеңеш токтом кабыл алды. Жабыр тарткандарга жардам көрсөтүү боюнча Бишкекте жана Кочкордо штаб түзүлүп, «Кыргызстан» банкында атайын эсеп ачылды.
Конституциянын жаңы редакция долбоорун авторлор тобу бейшемби күнү парламентке экинчи ирет сунуштоо чечимине келишти. Муну оппозициялык депутаттар мыйзамга да, ыйманга да сыйбай турган жорук дешип, кескин сындашууда. Байкоочулар Конституцияны кайра-кайра өзгөртүү Кыргызстандын саясий аброюна доо кетирип коет деп чочулап жатышат.
Кыргыз парламентин таркатуу маселеси парламентте бүгүн кайрадан көтөрүлдү. Конституциянын жаңы редакциясынын долбоорун сунуштаган депутаттардын бир кылкасы кырдаалдан чыгуунун мындан башка аргасы калбай калганын айтып чыгышты. Парламент азыр өзүн өзү таркатууга даярбы жана ал саясий айдыңда кандай өзгөрүүлөргө алып келиши мүмкүн?
Бул аптада кыргыз өкмөтү толук курамында кызматтан кетти. Бул саясий окуяга жалгай Баш мыйзамдын жаңы редакциясы кайрадан иштелип чыкты. Саясий айдыңдагы мындай дүрбөлөңдүү окуялар коомчулукта бийлик талаштан келип чыккан кезектеги саясий оюн катары сыпатталды.
Жогорку Кеңештин айрым депутаттары мамлекеттик башкаруудагы түзүлгөн саясий туңгуюктан чыгуу үчүн Конституциянын жаңы редакциясын кабыл алуу керек деген демилге көтөрүп, жаңы долбоор парламентке таратылуу алдында турат деп жарыялашты. Депутаттардын экинчи тарабы мындай демилгени президенттин бийлигин күчөтүү максатындагы соодалашуу катары баалап жатышат. Бирок, аталган демилге парламентте расмий сунуш катары ачыктала элек.
Бүгүн Жогорку Кеңеш депутаттары жабык кеңешме өткөрүп, анда парламентти таратууга мыйзамдык негиз жок деген тыянакка келишти. Өкмөт өзүнүн бийликтен кетишин реформаларга жол ачуу максаты менен байланыштырып, бул кадам парламентте партиялык тизме менен кайра шайлоо өткөрүүгө жол ачат деген үмүтүн билдирген. Депутаттар өкмөттүн кызматтан кетишин жоопкерчиликтен качуу катары баалашып, бул парламентти эч кандай кризиске алып келбей тургандыгын эскертишти.
Премьер-министр Феликс Кулов баштаган өкмөттүн кызматтан кетүүсү ар кыл түкшүмөлдөрдүн жаралышын шарттаган чукул окуя болду. Талдоочулар президент Курманбек Бакиевдин колдоосуна арзыган бул чечимдин артында Феликс Кулов баштаган өкмөттүн кеңейтилген курамын кайра бийликке алып келүү максаты менен байланыштырса, айрымдары муну парламентти таркатуу кызыкчылыгына жорушууда. Саясатчылардын кээ бири өкмөттүн кызматтан кетишин ойлонулбай жасалган опурталдуу кадам катары сыпатташат.
Кыргызстан келерки жылы Өзбекстан газынын миң куб метрин жүз доллардан сатып алууга макулдук берди. Тараптар бул маселени шаршембиде Ташкенде вице-премьер министрлердин деңгээлинде макулдашты. Октябрь айынан бери уланып келаткан сүйлөшүүлөрдүн мындай тыянагын кыргыз тарап жетишкендик катары баалады. Өлкө өтүп бараткан жыл үчүн газды Өзбекстандан 55 доллардан сатып алып жагып жатат.
Кыргызстанда иштеп жаткан Кумтөр Оперейтинг компани ишканасы тараткан маалыматка караганда, Кумтөр кенинин аймагынан 43,5 тонна алтын кени табылды. Бул кенди иштетүүнүн камылгалары үчүн ишкана 36 миллион доллар каражат ажыратты. Жергиликтүү саясатчылардын баамында Кумтөрдө алтын запасы ачыкталгандан алда канча арбын. Бирок, чет өлкөлүк ишкана менен кызматташтыкты түп-тамырынан өзгөртмөйүнчө Кумтөр алтын кени Кыргызстандын кызыкчылыгы үчүн толук кандуу кызмат кылууга кудуретсиз деп эсептешет.
«Манас» аба майданында 6-сентябрда болгон эки учактын кагылышуусу боюнча АКШнын Кыргызстандагы элчилиги менен аба-аскерий базасы өз тыянагын кечиктирип жатат. Мындай билдирүүнү бүгүн жарандык авиация департаменти жасады. Ушул эле күнү «Манас» эл аралык аэропортунун, «Кыргызстан» акционердик коомунун өкүлдөрү америкалык аскер базасын эки тараптуу жана эл аралык милдеттенмелерин аткарбай жатат деп айыпташты. АКШ элчилиги мындай билдирүүгө бүгүн жооп кайтарган жок.
Кыргызстандын ХИПИК программасына киришине каршы болгон жаштар тобу нааразылык акциясын адаттагыдай эле бүгүн дагы парламенттин алдында баштап, өкмөт үйүн, Улуттук Банк жана Дүйнөлүк Банк, Каржы министрлигин беттеп жөө жүрүш жасашты. Бул аралыкта расмий өкүлдөр Эл аралык каржы уюмдарынын миссиясы менен Кыргыз өкмөтүнүн сүйлөшүүлөрү аяктагандыгын кабарлашууда.
Эл аралык Transparency International уюму жакында жарыялаган иликтөө тыянагына караганда, дүйнөдөгү миллиондогон адамдар мамлекеттик кызматкерлердин паракордугунан жабыр тартышат. Өкмөттөр болсо коррупцияга каршы жетиштүү күрөш жүргүзүүгө кудурети жетпей жатат. Алардын катарында Кыргызстан да бар.
Жакынкы күндөрү Кыргызстанда коррупцияга каршы күрөшүү акциясы өтүшү мүмкүн. Мындай демилге бүгүн Коррупцияга каршы күрөш боюнча улуттук кеңештин алгачкы отурумунда көтөрүлдү.
Борбор Азия өлкөлөрүндөгү маалымат каражаттарынын абалы 19-октябрда «Маалымат каражаты жана ишкердик» аттуу конференцияда талкууланды. Конференция ЕККУнун демилгеси менен уюштурулган бул конференцияга Казакстан, Кыргызстан, Өзбекстан маалымат каражаттарынын өкүлдөрү, эл аралык эксперттер катышты.
Кыргызстандын баш мыйзамынын долбоорун даярдоо боюнча Венеция комиссиясы менен кыргыз парламентинин пикирлери дал келди. Бул тууралуу Венеция комиссиясынын отурумуна катышып келген Жогорку Кеңештин төрагасы Марат Султанов бүгүн билдирди. Тараптар Баш мыйзамды Конституциялык Кеңешме биринчи баскычында иштеп чыккан долбоордун негизинде даярдоону жакташты.
Соттун чечими менен «Пирамида» телерадиокомпаниясынын жарымы «Инвест-Медиа» ишканасына тийди. "Пирамида" жамааты «Инвест-Медиа» ишканасын телекомпаниянын бир кожоюну катары тааныбоо тууралуу арыз менен сотко кайрылган. Бишкек шаарындагы райондор аралык сот бул ишти 5-октябрда карап, арызды канааттандырган эмес. Бирок соттун чечимин арыздануучу тарап 16-октябрда гана уккан. Муну «Пирамида» жетекчилиги ушул эле күнү дароо коомчулукка жарыялап, соттун чечимин кескин сынга алды.
Дагы жүктөңүз
