26-июлда Москвада кечки саат ондор чамасында жумуштан кайтып келаткан эки кыргызстандык мигрантка улутчулдар кол салышкан. 17-19 жаштагы үч теңтуштун колунда бычактар болгон.
Бычактан жүрөккө алган жарааттан 25 жаштагы Аскарбек Т. уулу ошол жерден каза тапкан. Ал эми 32 жаштагы Уранбек К. колунан жараат алып, качып кетүүгө үлгүргөн. Ал бир жумадан кийин камакка алынган үч теңтушту таанып, аларга каршы көрсөтмө берген.
Жалал-Абад облусунан келген эки жердеш Москвада курулушта иштечү. Ошол күнү Малые Каменщики көчөсүндөгү жатаканага кайтып келатышкан.
Аксы районундагы Кара-Суу айылында туулуп-өскөн Аскарбектин сөөгү 29-июлда мекенине жөнөтүлгөн.
Москвадагы кыргыз элчилигинин басма сөз кызматкери Гүлбарчын Байымбетова каргашалуу окуяны тергөө иштери элчиликтин көзөмөлүнө алынганын билдирди:
Гүлбарчын Байымбетова.
«Элчиликтин юристи менен Кыргызстандын Ички иштер министрлигинин Москвадагы өкүлчүлүгүнүн кызматкери окуя болгон жерге барып, териштирүү иштерин жүргүзүшкөн. Орусиялык тергөөчүлөрдөн алынган маалымат боюнча биздин жарандар орус улутундагы үч кылмышкерге туш болушкан. Бул кылмышка катышы бар деген үч орусиялык камакка алынды. Бул иш элчиликтин көзөмөлүндө. Элчилик тарабынан Тергөө комитетине атайын өтүнүч жөнөтүлгөн».
Москванын Таганский район аралык тергөө комитетинин бөлүмүндө «Киши өлтүрүү» беренеси боюнча кылмыш иши козголду.
Федералдык коопсуздук кызматы киши өлтүрүүгө шектелген үч теңтуштун үйлөрүндө тинтүү жүргүзгөндө бычактын түрү, улутчул символика тагылган кийим-кече, адабият табылганын билдирет.
Үчөөнүн бири - «Белый» деген лакап аты бар 17 жаштагы өспүрүм ультра оңчул, улутчул топтордо белгилүү активист. Анын социалдык тармакта 1,5 миң жактоочусу бар тобу табылган. Ата-энеси өспүрүмдүн кызыккан нерселерин билишкенин, аны токтотуу аракетинен майнап чыкпаганын айтышты. Өспүрүмгө каршы азыр анын эки теңтушу көрсөтмө бергени кабарланды.