Спорт

Кыргызстан чемпион кыздарын тосуп алды

Айсулуу Тыныбекованын алтын медалы.

Намысты бийик көтөргөн үч кыз.

Дүйнө чемпионатына Кыргызстандын кыз-келиндер курамасынан үч балбан барды. Үчөө тең байге менен кайтты.

Мээрим Жуманазарова 22 жашта. Токиодо өткөн Олимпиада оюндарында коло байге уткан.

Мээрим Жуманазарова: Бул жеңишке даяр болчумун. Кыргыз элимди кубанычка бөлөдүм. Ийгиликтин сыры деле жок болсо керек. Жакшы машыктыруучу жана талыкпаган эмгек болушу керек. Жаштар алдына туура максат койсо баарына жете алат.

Айсулуу Тыныбекова: Акыркы бир айда жакшы даярдана алган эмесмин. Дүйнөлүк чемпионатта уялганыман, өжөрлүк менен эле жеңип чыктым. Биринчи мелдеш кыйын болду. Жандүйнөм, булчуңдарым ооруп турган, батыраак бүтсө экен деп жаттым. Режим кармабагандыктан салмагым да түшүп кетти. Бир ай спорт режиминен чыгып кетсең кыйын экен. Жаңылыштык, коркунучтук болгон жок. Адам ичинен өзүнө ишенсе баарына жетет, ишеним болбосо күчтүү болсо да жеңе албайт.

Мындан кийин машыга берем, бирок азыр ички дүйнөмдүн тынчтыгын каалап турам. Алдыдагы Олимпиадага даярданышым керек.

Айсулуу Тыныбекова эгемен Кыргызстандын тарыхында Күрөш боюнча дүйнө чемпионатынын финалында эки жолу күрөшүп, эки жолу тең жеңишке жеткен алгачкы спортчу болуп калды.

Айпери Медет кызы: Дүйнө чемпионатына алтын медал алам деп баргам. Спорт деген спорт экен. Коло алдым. Акыркы мелдеште эстон кыз менен күрөштүм. Утуп келе жатып акыркы 30 секундада утулуп калдым. Машыктыруучуларга рахмат, буюрса алдыдагы беттеште сиздерди сүйүндүрөм деген үмүттөмүн.

28 жаштагы Айсулуу Тыныбекова ушуну менен дүйнө чемпионатына 3-жолу катышты. Буга чейин кыз-келиндер күрөшү боюнча Дүйнө чемпионатынын алтын (Нур-Султан, 2019-ж.) жана коло медалдарын (Париж, 2017-ж.) тагынган. Токиодо өткөн Олимп оюндарында күмүш медал тагынган. Азиянын төрт жолку чемпиону. Айсулуу Кыргызстандын спорт тарыхында күрөш боюнча Дүйнө чемпионатынын финалына эки жолу чыгып, эки жолу тең жеңишке жеткен биринчи балбан.

Спортчуларды "Манас" аба майданынан жакындары жана спорт ышкыбоздору тосуп алышты.

Бүгүн таң эрте "Манас" аба майданынын спорт сүйүүчүлөрү дүйнө чемпиондору Айсулуу Тыныбекова, Мээрим Жуманазарова жана дүйнө чемпионатынын коло байгесинин ээси Айпери Медет кызын тосуп алышты.