Украинада согуш башталган бир айдан бери Кыргызстандын Тышкы иштер министрлиги жана элчиликтин көмөгү менен жалпысынын 718 кыргызстандык коопсуз аймакка чыгарылды. Бул тууралуу Украинадагы элчи Идрис Кадыркулов "Азаттыкка" курган маегинде билдирди.
Кадыркулов билдиргендей, учурда 68 кыргызстандык жаран Украина аймагында кала берүүдө.
-Украина аймагынан чыга элек жарандар кайсы шаарларда?
- Элчилик эвакуация иштерин улантууда. Бирок, айрым жарандар бир нече себептер менен Украинадан чыгуудан баш тартышты. Кээ бирлери чечим кабыл ала элек болууда. Алар Киев, Харьков, Львов, Одесса, Ивано-Франковск, Днепр шаарларында калууда. Анын ичинде Украин жарандыгына ээ болгон үй-бүлө мүчөлөрү дагы бар. Бардыгына жардам бергенге аракет кылып жатабыз. Мисалы, атасы же энеси кыргыз жараны, бирок уул-кыздары, түгөйлөрдүн бири украин жарандары болгон учурлар бар. Биз аларды дагы мекенге чыгарууга аракет кылып, сунуштарды айтып жатабыз.
- Демек, ошол кала бергендер арасында Украинанын жарандыгын алгандар дагы бар турбайбы?
- Андайлар дагы бар. Дагы бир айты кетүүчү нерсе, аскерге чакырууга мөөнөтү келген 18ден 60 жашка чейинки эркектерди жаңы кабыл алынган мыйзамга ылайык, өлкө аймагынан чыгарбай жатышат. Ошондой дагы жагы бар.
- Украинанын жарандыгын алган кыргызстандыктардын саны канча?
- Эч кимге жашыруун эмес, Кыргызстандын жарандыгынан чыкпай туруп Украинанын жарандыгын алгандар дагы көп. Буга биздин мыйзамдар уруксат берет. Жаран өзү кайрылыш керек же соттун чечими менен эле Кыргыз Республикасынан жарандык алынат.
- Украинанын дээрлик бардык шаарлары аткылоого туш болууда. Ал жакта калган кыргызстандыктар менен байланыш кандай? Элчилик кантип иштеп жатат?
- Украинанын чыгышында жана борборунда аскердик салгылашуулар болууда. Биз 3-марттан тартып, өлкөнүн батыш тарабында өз ишибизди жүргүзүп жатабыз. Алгач Львовдо, анан Ужгороддо болдук. Кызматкерлерге керек болгон бардык жабдыктар жаныбызда. Эвакуациядан сырткары консулдук тейлөө дагы толук кандуу жүргүзүлүүдө. Жарандарга документтер таризделип жатат. Ишеним кат, маалым каттарды өз убагында жасап берүүдөбүз.
- Украин жарандыгын алган кыргызстандыктар арасында армияга чакырылгандар бар-жогу тууралуу маалымат барбы?
- Чакырылгандар деле болсо керек. Бирок азыркы абалга карата Украинанын Тышкы иштер министрлиги жана Куралдуу күчтөрүнөн маалымат алуу абдан оор болуп жатат.
- Сиздер турган аймакта абал коопсуз элеби? Коргонуу, азык-түлүктөн кыйынчылыктар жокпу?
- Жалпы абал оор эле. Эки тарап тең чоң жоготууларга дуушар болуп жатышат. Жалган маалыматтар дагы көп болууда. Кыргызстандагы маалымат каражаттарында дагы ачык эле фейктерди тараткандар болуп жатат. Украинанын батыш аймактарында азык-түлүктөр жетиштүү эле. Чындыгын айтканда, тамак-аш тууралуу деле ойлонгон жокпуз, кызматкерлерибиз тобокелге салып эле иштеп жатышат, Кудай сактасын деп эле.
- Элчиликтин кызматкерлери азырынча Украинанын аймагында эле иштеп турушабы же өлкөдөн чыгып кетүү боюнча пландар сүйлөшүлдүбү?
- Украинадагы Кыргызстандын элчилиги миссиясын аткарып жатат. Андай сунуш болгон эмес, абалды карап турабыз. Өлкөдөн кеткен жокпуз, иштеп жатабыз.
- Кыргызстандыктар арасында жараат алып, жабыркагандар жокпу?
-Жабыркагандар, жоготуулар жок. Кудай сактасын.