Тбилисиде түнү менен нааразылык акциялары өттү. Элдин нааразылыгына орусиялык депутат-коммунист Сергей Гавриловдун Тбилисидеги сапары учурунда спикердин ордуна отурганы себеп болду.
Тбилиси тынч эмес
Грузин парламентинин алдындагы нааразылык акциясында полиция демонстранттарга каршы желим окторду жана көздөн жаш агызуучу газды колдонду.
Саламаттык сактоо министрлигинин маалыматына караганда, Тбилисидеги кагылышта 240 демонстрант, дагы 80 полиция кызматкери жаракат алган.
Нааразылык акциясына чыккандарды Михаил Саакашвили да колдоп, полицияны "эл тарабына өтүүгө" үндөдү.
Таңга маал Грузиянын күч түзүмдөрү кырдаалды толук көзөмөлгө алып, демонстранттар парламенттин аймагынан чыгып кетишти. Бирок оппозициянын лидерлери 21-июнда нааразылык акциялары улана турганын убада кылууда.
Жергиликтүү маалымат каражаттары башаламандык учурунда бир канча адам кармалганын жазды, бирок бул тууралуу азырынча так маалымат жок.
Полиция демонстранттарга каршы эки жолу көздөн жаш агызуучу газды колдонду.