Быйыл февралдан бери Ооганстанда камакта отурган америкалык Фэй Холл бошотулду. Соңку сегиз күндө экинчи америкалык жаран Кошмо Штаттардын өкүлдөрүнүн "Талибан" башкаруучулары менен сүйлөшүүлөрүнүн аркасында эркиндикке чыкты.
29-мартта АКШ президенти Дональд Трамп жарыялаган видеодо Фэй Холл: "Американын жараны экениме мынчалык сыймыктанган эмесмин!" - деп айтат.
"Рахмат, урматтуу президент. Сизди кудай колдосун", - деген аялдын ыраазычылыгына Трамп дагы комментарий берди.
"Сиздин айтканыңыз мен үчүн чоң урмат-сый!" - деди америкалык лидер.
АКШнын Ооганстан боюнча мурдагы чабарманы Залмай Халилзад америкалык жаран 27-мартта бошотулганын, Катардын Кабулдагы делегациясынын колунда экенин Х платформасына жазган.
"Талибан" бошоткон америкалык жаран Фэй Холл биздин дострубуздун - Кабулдагы катарлыктардын кароосунда, жакында мекенине сапар тартат", - деп билдирген.
20-мартта америкалык Георг Глезман талибдердин барымтасында эки жарым жыл отурган соң бошотулган. Ал 2021-жылы "Талибан" бийликти басып алгандан кийин АКШнын жогорку даражалуу өкүлдөрүнүн Кабулга болгон биринчи сапары маалында ишке ашкан.
Глезман эч кандай келишимисиз, ооган бийлигинин "жакшы ниет" катары бошотулганы кабарланган.
Глезман 2022-жылы турист катары Кабулга барганда кармалган. Ага чейин ал Атланта шаарындагы Delta Airlines авиакомпаниясында механик болуп иштечү.
Ооганстанда дагы бир нече америкалык жаран түрмөдө отурат.