Бишкектин Ленин райондук ички иштер башкармалыгы (РИИБ) “ден соолугунан мүмкүнчүлүгү чектелген кызды өзүнүн атасы зордуктаган” деген маалымат боюнча комментарий берди.
Милициянын маалыматына караганда, 2024-жылдын 30-декабрында үй-бүлөлүк зомбулук тууралуу билдирүү түшкөн. Бул факт боюнча С.Б. аттуу адам Укук бузуулар кодексинин “Үй-бүлөлүк зомбулук” беренесинин негизинде кармалып, сот аны Бишкек шаардык милициясынын убактылуу кармоочу жайына жети күнгө камакка алган.
Шектүүнүн аялы (К.Д) ден соолугунан мүмкүнчүлүгү чектелген 17 жаштагы кызын өз атасы зордуктаганын айтып, арыз менен милицияга кайрылган.
Бул факт Ленин райондук ички иштер башкармалыгында катталып, баштапкы текшерүү иштери башталды. Ушул тапта бардык зарыл экспертизалар дайындалды. Анын жыйынтыгы менен юридикалык баа берилет.
Буга чейин журналист Алтынай Арстанбекова Фейсбуктагы баракчасынан түз эфирге чыгып, кыздын энеси менен маектешкен. Анда ал жолдошу бир топ жылдан бери ага зордук-зомбулук көрсөтүп келатканын, акыркы жолу былтыр 30-декабрда сабаганын айткан. Милиция ошол эле күнү күйөөсүн кармап кеткенин жана кийин кызы зордукталганын билгенин кошумчалаган.
“Азаттык” арызданып жаткан аялдын жолдошу же анын жакындары менен байланыша алган жок. (BTo)
Дагы караңыз
Орусияда мыйзамсыз жүргөн кыргыз жарандарына укуктук жардам керектиги айтылдыМинистрлик “Сапаттын” мугалимдери мурдагыдай эле иштей берерин билдирдиЫсык-Көлдө ипподромдун жанындагы 11,7 гектар жер мамлекетке кайтарылдыТокмокто айдоочу эне-баланы сүзүп, төрт жаштагы кыз чарчап калдыЗапорожьеге урулган соккудан кеминде 13 киши каза болду, 60тай киши жараат алды