Борбор калаада жол тыгын көйгөйү чечилди деген маалымат чындыкка дал келбесин депутат Дастан Бекешев 28-ноябрда парламенттин отурумунда айтып чыкты. Депутат бул тууралуу өкмөттүн Жогорку Кеңештеги өкүлү Алмазбек Абытовдун маалыматынан кийин айтып, тыгын маселеси тескерисинче күчөп жатканын белгиледи.
"Келиңиз, кагаздагы эмес, чыныгы жашоону көрөлүчү. Кечинде капкараңгыда көпчүлүк студенттер көчөдө үйлөрүнө барышат. Автобус күтүп, 2-3 автобусту которуп жүрүп, үйлөрүнө өтө кеч жетерин айтып атышат. Тыгын аз келгенсип, автобекеттерди шаардын сыртына чыгарып салдыңар. Бул дагы аз келгенсип, троллейбустарды жок кылдыңар. Адамдар үйлөрүнө кантип жетип атышат? Статистиканы кайдан алып жазышат деги?", - деди Бекешев.
Дагы бир депутат Элдар Абакиров автобекеттерди шаар сыртына чыгарып салуу Бишкекке Чүй облусунун жакынкы райондорунан келип окуган студенттер үчүн кыйынчылык жаратканын белгиледи. Ал студенттер менен жолуккан учурда алар автобекетке жетүү үчүн такси жалдоого аргасыз болуп жатышканын айтып, даттанышканын кошумчалады.
Депутат автобекеттердин шаардын сыртына чыгарылышы жол тыгынын азайтмак түгүл, тескерисинче көбөйткөнүн айтып, шаарга учурда таксилер көп каттап жатканын белгиледи.
Бишкекте Батыш, Чыгыш автобекеттери 23-октябрда жабылып, андагы автобус, такси каттамдары шаардын сыртына чыгарылган. Ошондон кийин элде автобекеттердин шаардан алыстыгына нааразылыктар пайда болгон. Өлкөнүн түндүк-чыгышындагы аймактарга кетүү үчүн Алматы-1/1 дарегине жайгашкан "Бишкек" автобекетине, ал эми өлкөнүн түштүк-батышындагы аймактарына кетүү үчүн Сокулук тараптагы жаңы ипподромдун жанына жылдырылган убактылуу автобекетке жетүү машакатка айланганы соцтармактарга жарыяланган.
Мэрия бул шаардагы жол тыгынды азайтуу максатында убактылуу чара экенин, жаңы автобекет Фучик көчөсүнө курулуучу ири комплекске жайгашарын билдирген. (ZKo)
Дагы караңыз
Милиция Чүйдө 12 мектеп окуучусу таттууга ууланганын билдирди Парламентте мугалимдерге ноутбук алуу маселесин иликтөө талабы коюлдуКыргызстанда 813 адам мунапыс менен абактан чыктыСөгүшкө жеткирген ноутбуктар: алешемдик кимден кетти? Ташкент Түркияда качып жүргөн жарандарын кайтарабы?