Азия өнүктүрүү банкы Кыргызстандын бюджетине 50 млн долларлык колдоо көрсөтөт. Анын 43 млн доллары насыя, 7 млн доллары грант түрүндө берилет.
“Ынтымак Ордодон” билдиргендей, каржылык колдоо боюнча макулдашууну ратификациялоо жөнүндө мыйзамга президент Садыр Жапаров кол койду.
2024-жылдын 4-июлунда кол коюлган “Туруктуу финансылык башкарууну жана мамлекеттик башкарууну жакшыртуу программасы” деп аталган насыялык жана гранттык макулдашуу түзүлгөн. Аны ратификациялоо мыйзамын Жогорку Кеңеш 13-ноябрда кабыл алган.
Келишим боюнча, ал каражат түздөн-түз республиканын бюджетине жөнөтүлөт. Аны Министрлер кабинети Жогорку Кеңеш менен макулдашып өздөштүрөт.
Финансы министрлигинин сайтындагы маалымат боюнча, 2024-жылдын биринчи жарым жылына карата Кыргызстандын Азия өнүктүрүү банкына 710 млн доллардан ашуун карызы бар. Бул өлкөнүн тышкы карызынын 16% жакын. (KbA)
Дагы караңыз
Акылбек Жапаров ченемдик укуктук актыга алгачкы электрондук кол койдуСот Жогорку Кеңештин мурдагы төрагасы Канатбек Исаевди камакка алдыБанктар менен каржы уюмдарынын кирешеси 26% өстү