Мамлекеттик салык кызматы курулуш компанияларына кошумча нарк салыгын кайрадан киргизүүнү Жогорку Кеңешке сунуштады. Анда курган батирин чарчы метрин 1000 доллардан кымбат сатпаган гана курулуш компанияларын кошумча нарк салыгынан (НДС) бошотуу каралган. Бул тууралуу салык кызматынын төрагасы Алтынбек Абдувапов 1-радиого курган маегинде билдирди.
Ал курулуш компаниялары кошумча нарк салыгынан батирлердин баасын арзандатсын деген максатта бошотулганын, бирок иш жүзүндө андай болбогондуктан, кошумча нарк салыгын төлөөгө милдеттендирүү керек деп эсептейт.
"Булар көп батирлүү, 12-14 кабат үйлөрдү куруп, салык төлөшпөйт. Сатып жаткан батирлердин чарчы метри 1,5 миң доллардан 3 миң долларга чейин сатылууда. Батирдин чарчы метрине болсо 500-600 доллардан гана сарпташат. Неге салык албашыбыз керек? Курулуштан дээрлик эки эсе пайда көрүп жаткан соң, салыкты толук түрдө төлөөгө милдеттүү. Биз батиринин 1 чарчы метрин 1000 доллардан ашырбай саткан курулушчуларды кошумча нарк салыгынан бошотууга даярбыз", - деди Абдувапов.
Риэлторлордун маалыматында, ушул тапта Кыргызстанда курулуп жаткан көп кабаттуу турак жайдагы батирлердин бир чарчы метри (толук бүтпөгөн) жайгашкан жерине жана тибине жараша 850-900 доллардан 1500-2000 долларга чейин сатылууда. Айрым эксперттер Кыргызстандагы коммерциялык курулуш компаниялары өтө жогорку киреше менен иштеп жатканын, мындай компанияларга жалаң байлар, олигархтар гана ээлик кыларын белгилеп жүрүшөт.
Ошол эле учурда Бишкек шаарында жана Ош шаарында көп кабаттуу турак жайдан батир сатып алган бир топ жарандар курулуш бүтпөй, мыйзам бузуулар болуп жатканын айтып, бийликке утур-утур кайрылуу жолдоп келет.(ZKo)
Дагы караңыз
Беларуста дагы 32 саясий туткунга ырайым берилдиУкраина Орусиянын жапырт ракеталык чабуулуна кабылганын билдирдиОрусияда саясий туткун Мифтаховду жалгыз камерага которушту"Парламентёрдун" сырдуу каты. Ташиевге ким коркунуч жаратууда?Мүлкү жоктор “Топтомо ипотеканы” кантип алат?Акын, “Азаттыктын” журналисти Бурулкан Сарыгулова Алыкул сыйлыгынын лауреаты болду