Беларустун авторитардык башчысы Александр Лукашенко камакта жаткан саясий туткундар арасынан дагы 32 кишиге ырайым берүүнү чечкенин "Азаттыктын" беларус кызматы 20-ноябрда жазды. Бирок абакта дагы 1300дөй активист кармалууда.
Ырайым алгандар 24 эркек жана сегиз аял, алардын тогузу 50 жаштан ашып калган курактагылар экени кабарланды. Аты-жөнү жарыяланган жок, бирок баары "экстремизм үчүн" деп соттолгондор. Беларус бийлиги адатта мындай айыпты бийликти сындаган жарандарына, оппозиция өкүлдөрүнө, активисттерине тагат.
Абактан бошотулгандан кийин алар тийиштүү мекемелердин көзөмөлүндө болот, анткени ырайым берилгени менен соттуулугу жоюлбайт.
Ушуну менен Беларуста быйыл жыл башынан бери саясий туткундарга алтынчы жолу ырайым жарыяланып жатат, жалпысынан 178 киши түрмөдөн чыкты.
Беларуста бийлик оппозицияны коркутуу, элдин нааразылыкка чыгышына жол бербөө максатында күч кызматкерлеринин атайын машыгуусун уюштуруп жатканын бозгундагы оппозиция лидери Светлана Тихановская билдирди.
2020-жылы Беларуста оппозициянын ири нааразылык акциясы Лукашенко кайрадан өзүн президент деп жарыялап алган шайлоодон кийин тутанган. Миңдеген кишилер митингге чыккан. Акция күч менен таркатылып, көпчүлүгү кармалып, камакка алынган, оппозициянын лидерлери жана айрым өкүлдөрү сыртка чыгып кетүүгө мажбур болгон. Бир нече киши полициянын зомбулугунан каза тапкан. Укук коргоочулар кармалгандар полициянын жана атайын кызматтын кыйноосуна кабылгандыгынын далили бар экенин айтып жүрүшөт.
Кезектеги президенттик шайлоо 26-ноябрда өткөнү жатат. (RK)
Дагы караңыз
Акын, “Азаттыктын” журналисти Бурулкан Сарыгулова Алыкул сыйлыгынын лауреаты болдуЖКда мугалимдерге каршы укук бузууларга айыпты көтөрүү сунушталдыУкраина Орусиянын жапырт ракеталык чабуулуна кабылганын билдирдиЖазуучулар союзунун 90 жылдыгы белгиленди