Өзгөчө кырдаалдар министрлиги (ӨКМ) Ноокат районуна куткаруу иштери үчүн тик учак жөнөп кеткенин кабарлады.
ӨКМ буга чейин тик учак аба ырайын байланыштуу учурулбай жатканын билдирди.
“Белгилей кетсек, 28-июнда түштөн кийин жана 29-июнда таң эрте аба ырайы бузулуп, ашууларды булут каптап жабылганына байланыштуу, тик учак учуусу токтотулган. Ал эми азыр аба ырайын турукташкан соң, тик учак жардамга жөнөтүлдү”, - деп айтылат ӨКМдин билдирүүсүндө.
Социалдык тармактарда сел жүргөн аймактарда куткаруу иштерине ӨКМнын тик учактары тартылбагынын сындап жазгандар бар.
28-июнда Ош облусунда селден беш кишинин өмүрү кыйылганы тастыкталды. Өзгөчө кырдаалдар министрлигинин басма сөз кызматы тараткан соңку маалыматта мындан тышкары дагы эки киши дайынсыз болуп жатканы айтылды.
Издеп-куткаруу иштерине Ош шаарынан, Араван жана Кара-Суу райондорунан да куткаруучулар тартылууда. Ишти өзгөчө кырдаалдар министринин орун басары Эделбек Кулматов координациялоодо. Жалпы 637 адам, 19 техника тартылды. Ноокат районунда өзгөчө кырдаал жарыяланды.
24-июнда Баткен облусундагы Кадамжай районунун Жеңиш айылында беш жашар бала селге агып каза тапкан. Өткөн аптада Жалал-Абад облусунун Ноокен районунда 10 жаштагы өспүрүм сел алып көз жумган. (TSh)
Дагы караңыз
ӨКМ Абшыр-Атада эвакуациялоо иштерин улантууда