Израилдин армиясы - ЦАХАЛ шейшемби күнү аскерлери ХАМАС куралдуу тобу көзөмөлдөгөн Газадагы парламенттин, өкмөттүн жана полиция кеңсесин басып алганын жарыялады.
ХАМАС тобу АКШ жана Евробиримдикте террордук деп таанылган.
ЦАХАЛ инженердик факультеттин имаратын да басып алганын, ал жерде “курал-жарактар жасалып турганын” билдирди. “ХАМАС террордук уюмунун өкмөттүк мекемелери согуштук максаттарда, анын ичинде 7-октябрда Израилге кол салууга даярдык көрүү үчүн колдонулган”, - деп айтылат Израилдин армиясынын билдирүүсүндө.
ХАМАС куралдуу тобунун жоочулары 7-октябрда Израилдин шаар-кыштактарына Газа тараптан чабуул койгондо туш келди ок атып, 200дөн ашуун кишини барымтага алган. Израил ХАМАСка согуш жарыялап, палестин анклавын бомбалай баштаган.
ХАМАС башкарган Газанын Саламаттык сактоо министрлигинин маалыматында, 7-октябрдан бери тилкеде 11 миңден ашуун адам мерт болду. Алардын 4500дөйү балдар. Тилкеде гуманитардык абал курч.
14-ноябрда БУУ соңку күндөрдө 200 миңдей палестиналык Газанын түндүк бөлүгүн таштап кеткенин, түштүктө гуманитардык абал кескин начарлаганын билдирди. (BTo)
Дагы караңыз
Башаламандыкка чакырган деген шек менен Фейсбуктун дагы бир колдонуучусу кармалдыКөлбаевдин уюшкан кылмыштуу тобунун дагы бир мүчөсү кармалдыГазанын түштүгүндө гуманитардык абал оор Паранжыга, узун сакалга тыюу салуу боюнча мыйзам долбоору коомдук талкууга коюлду 14-ноябрда Украинанын бүткүл аймагында сирена жаңырды