14-ноябрда Украинанын бүткүл аймагында аба соккусу коркунучун эскерткен сирена жаңырды. Аскер бийликтери орус авиациясынын МиГ-31К согуштук учактары базаларынан көтөрүлгөнү тууралуу маалымат түшкөнүн билдирди.
Анын алдында Днепропетровск облусунун Никопол шаарында орусиялык дрондордун чабуулунан бери дегенде бир киши каза таап, экинчиси жарадар болгон. Бул тууралуу облусттун губернатору Сергей Лысак Телеграм-каналга жазды.
Днепропетровск орус армиясынын соккуларына такай туш болуп келаткан аймактардын бири.
Муну менен катар Украинанын Аба күчтөрү шейшембиге караган түнү орусиялыктар аннексияланган Крымдан аткан тогуз "Шахед" жанкечти дрондун жетөө атып түшүрүлгөнүн билдирген. Бирок кайсы регион чабуулдарга кабылганы жана жапа чеккендер тууралуу кабарланган жок.
Орус армиясы Запорожье облусунун оккупацияланган бөлүгүнүн аба мейкиндигинен "Искандер" баллистикалык ракетасын жана Х-35 ракетасын атканы маалымдалды.
Ал эми Орусиянын Коргоо министрлиги учак түрүндөгү дрондор 14-ноябрга караган түнү Москва, Тамбов, Орел жана Брянск облустарында атып түшүрүлгөнүн билдирди.
Орел облусунун губернатору Андрей Клычков "инфраструктура зыян тартпаганын, эч ким жабыркабаганын" билдирди.
Киев бул маалыматты комментарийлеген жок.
Буга чейин орус аскердик мекемеси каршы тараптын дрондору тууралуу 12-ноябрда кабарлаган. Ошондо Белгороддун үстүнөн эки дрон жок кылынганы айтылган.
