Бишкек шаардык соту 13-сентябрда жазуучу, публицист, тергөө абагында отурган Олжобай Шакирдин кармалышын мыйзамдуу деп тапты. Бул тууралуу “Азаттыктын” сот жараянына катышкан кабарчысы билдирди.
Улуттук коопсуздук боюнча мамлекеттик комитет (УКМК) Олжобай Шакирди 23-августта кармаган. 24-августта Бишкектин Биринчи май райондук соту аны 23-октябрга чейин УКМКнын тергөө абагына камоо чечимин чыгарган. Адвокаттар жазуучунун кармалышы жана камакка алынышын мыйзамсыз деп эсептеп, Бишкек шаардык сотуна кайрылышкан.
Атайын кызмат Олжобай Шакирге (Эгембердиевге) Кылмыш жаза кодексинин “Массалык башаламандыктар” беренеси менен кылмыш иши козголгонун 25-августта билдирген. Маалыматта шектүү “Facebook, TikTok жана YouTube социалдык тармактарында чагымчыл маанайдагы билдирүүлөрдү жайгаштырып, бийлик өкүлдөрүнүн мыйзамдуу талаптарына жигердүү баш ийбөөгө жана массалык башаламандыкка чакырган билдирүүлөрдү жайгаштырып келгени, бул боюнча эксперттик корутунду да чыкканы” айтылат.
Олжобай Шакир бийликтин дарегине ачуу сын-пикир айтып келет. Соңку күндөрү Ысык-Көлдөгү төрт пансионаттын Өзбекстанга башкарууга берилишин сындап, ага каршы чыккан. Президент Садыр Жапаров менен УКМК төрагасы Камчыбек Ташиевди маекке чакырган. 31-августта нааразылык акциясын өткөрүү демилгесин көтөрүп жаткан.
Олжобай Шакир 2017-жылдары “РухЭш” коомдук агартуу багытындагы сайтты негиздеген. Сайт “Улут үлгүсү” жана “Улут абийири” сыйлыктарын уюштуруп, алар коомчулукта кадыр-баркка ээ, коомчулуктун көйгөйүн көтөрүп келген ишмерлерге берилип келет. (TSh\ErN)
Дагы караңыз
Мамлекеттик сыйлык алгандар жана коомчулукта сындалгандарАбдыкеримовду камоо чечими бизнеске кооптуу коңгурообу?Министрлик “Дастан” менен “Евразия сактык банкын” кайра Мүлк фондуна өткөрөт