Президент Садыр Жапаров 29-августта Жалал-Абад шаарында анын атасы Нуркожо Мусталый уулунун аты коюлган ислам маданий борборунун ачылышына катышты.
Анын басма сөз кызматы бул имаратты курууга каражат кайдан алынганын тактаган жок.
"Президент шаарда мусулмандардын намаз окуй турган жаңы жери пайда болгонун белгиледи. Бул ислам борбору элдин диний сабаттуулугун жогорулатуу максатында жакшы ниет менен курулган. Имараттын биринчи жана экинчи кабатында намаз окуй турган жайлар бар, жалпысынан 450 кишиге ылайыкталган. Президент бул борбордо намаз окуду. Жер төлөдө имамдардын билим алышына керектүү бардык шарттары бар үч бөлмө жана чет элдик коноктор үчүн жатакана да салынган. Объектинин курулушу былтыр августта башталып, бир жылдын ичинде толугу менен бүткөрүлгөн",- деп жазылган маалыматта.
Садыр Жапаровдун атасы Нуркожо Мусталый уулу 2017-жылы 84 жаш курагында каза тапкан.
Анын үй-бүлөсү 1930-жылдары кулакка тартыларда Кытайга кетип, 30 жылдан кийин кайра мекенине кайтып келгени айтылган.