Ички иштер министри (ИИМ) Улан Ниязбеков 21-августта өлкөдө коопсуздукту камсыздоо боюнча онлайн кеңешмеде маңзат соодасына аралашкан деген шек менен кармалган милиция кызматкерлери боюнча комментарий берди. Министрликтин маалыматына ылайык, Улан Ниязбеков өздүк курамда жетиштүү иш алып барбаганы үчүн айрым жетекчилер кызматтан алынганын айтты.
“Бул акыркы чечим эмес. Анткени буга чейин болуп өткөн коллегияларда, аппараттык кеңешмелерде “эл үчүн таза иштегиле, өздүк курамга катуу көңүл бургула” деген бир катар тапшырмаларды бергенбиз. Жакын арада ушуга окшогон дагы бир топ чечимдерди кабыл алып, мындан да катаал чараларды көрөбүз”, - деди Ниязбеков.
17-августта Улуттук коопсуздук боюнча мамлекеттик комитет (УКМК) Бишкекте синтетикалык баңгизат соодасына шек саналып беш милиция кызматкери кармалганын билдирген. Кылмыш-жаза кодексинин “Баңгизаттарды мыйзамсыз жүгүртүү”, “Опузалап пара талап кылуу” жана “Кылмыш чөйрөсүн түзүү” беренелери менен иш козголгон.
Атайын кызматтын маалыматы боюнча, милиция кызматкерлери синтетикалык маңзатты сатып алган адамдарды аныктап, аларды кармаган учурду телефонго тартып алып камайбыз деп акча өндүрүп жүрүшкөн.
Бул окуядан кийин Бишкек шаардык ички иштер башкармалыгынын башчысы Азамат Ногойбаев, анын орун басары Кылычбек Жолдошов, Бишкек шаардык жана Чүй облустук милициясынын баңгизаттарды мыйзамсыз жүгүртүүгө каршы күрөшүү боюнча кызматынын башчылары Мухтарбек Токтогулов менен Азамат Имангазиев кызматынан алынды. Дагы 12 жетекчиге ар кандай тартип жаза чарасы колдонулду. (BTo)
Дагы караңыз
УКМК кармалган чеченстандык активист боюнча маалымат бердиСүлүктүдө өрттөн жараксыз болгон жети үй кайра курулат Пансионаттарды Өзбекстанга башкарууга берүүгө негиз болгон документтерди ачыктоо талабы коюлду Кыргызстан он чакты көмүр кенин Кытай менен бирге иштетмей болууда Кыргызстанда чеченстандык активист Мансур Мовлаев кармалдыКемпир-Абад иши: абактагылар ачкачылык жарыялай турганын билдиришти