Улуттук коопсуздук боюнча мамлекеттик комитети (УКМК) мекемелер аралык жумушчу тобу менен бирге Ош облусундагы диний жайлардын ишмердигин текшерди.
Иш-чара “Диний чөйрөдөгү мамлекеттик саясаттын концепциясын” ишке ашыруу боюнча жүргүзүлүп жаткан иштин алкагында 20-июлдан тарта башталган.
Натыйжада 39 мечиттин жана 21 медресенин ишмердиги убактылуу токтотулду. 39 диний жана сыйынуу жайларына айып пул салынды. 48 мечитке жана 40 медресеге өрт коопсуздугунун талаптарын бузганы үчүн акты түзүлгөн.
Текшерүү учурунда айрым мечит-медреселердин башаламан курулушу, архитектуралык-курулуш жана санитардык-эпидемиологиялык талап-ченемдердин сакталбаганы, медреселердеги билим берүүнүн бирдиктүү стандарттарынын жоктугу, "хужра", "таалим", "дарс" ж.б. диний билим берүү процессине көзөмөлдүн жоктугу аныкталган.
39 мечит каттоого алынган эмес, тиешелүү документтери жок болгон.
Диний жайларды текшерген мекемелер аралык жумушчу топко атайын кызматтан, Ички иштер министрлигинен, Дин иштери боюнча мамлекеттик комиссиядан, Өзгөчө кырдаалдар министрлигинен, Саламаттык сактоо министрлигинен, муфтияттын, президенттин Ош облусундагы ыйгарым укуктуу өкүлчүлүгүнөн жана “Кадастр” мамлекеттик мекемесинен өкүлдөр кирген.
Кыргызстанда жалпысынан 3,5 миңден ашуун диний уюм каттоодон өткөн. Өлкөдө 2,6 миңдей мечит, 100дөй медресе, 10 ислам институту бар. Христиан багытындагы уюмдардын саны - 399, калгандары башка диндерге таандык.
Дин иштери боюнча мамлекеттик комиссиянын маалыматына караганда, 21 уюм деструктивдүү, экстремисттик жана террористтик деп табылып, сот чечими менен өлкө аймагында ишмердигине тыюу салынган. Алардын катарында "Хизб ут-Тахрир", "Йакын инкар" жана башкалар бар.(ZKo)
Дагы караңыз
Майыптыгы бар аялга орой мамиле кылган айдоочуга чара көрүлөт"Москва Грузиядагы агрессиясы үчүн жазаланса, Украинага даабайт эле"АКШнын жогорку даражадагы дипломаты Нигердеги козголоңчулар менен жолукту"Бангладештен тигүүчү чакырдык". Толбогон иш орундары, токтобогон миграцияБУУнун эксперттери Бакуну Лачын коридорун ачууга чакырышты