Ички иштер министрлиги блогер Улукбек Карыбек уулуна байланыштуу топтолгон материалдар Бишкектин Биринчи Май райондук сотуна жиберилгенин бүгүн, 15-июлда кабарлады. Блогер "милициянын мыйзамдуу талаптарына баш ийген эмес" деп шек саналууда.
ИИМдин маалыматына ылайык, 2023-жылдын 10-июлунда блогер Улукбек Карыбек уулу Саламаттык сактоо министрлигинин имаратына видео тартуу тобу менен кирип барган. Күзөт кызматы аларды министрдин иш бөлмөсүнөн чыгуусун өтүнгөн учурда ЖМК жөнүндө мыйзамга таянып өздөрүн орой алып жүрүп, коомдук тартипти бузган. Бул тууралуу милицияга Биринчи Май райондук күзөт бөлүмүнүн жооптуу кызматкери маалымат берген.
Жогорудагы аталган факт Биринчи Май райондук ички иштер бөлүмүнүн маалыматтарды каттоо электрондук журналына катталып, текшерүү иштери башталган. 14-июлда Укук бузуулар жөнүндө Кодекстин "Ички иштер органдарынын кызматкеринин мыйзамдуу талабына баш ийбөө" беренесинин негизинде Улукбек Карыбек уулу бөлүмдүн коомдук коопсуздук кызматына жеткирилип, протокол толтурулгандан кийин коё берилген.
Түзүлгөн укук бузуу протоколдору Бишкек шаарынын Биринчи Май райондук сотуна жиберилген.
Блогер жана анын жакындары бул тууралуу маалымат бере элек. Маалыматта анын кайсы маселе боюнча министрликтин мекемесине барганы айтылган эмес.
14-июлда блогер Улукбек Карыбек уулу "бейбаштык" беренеси менен козголгон кылмыш иштин алкагында Ош шаардык Ички иштер башкармалыгынын убактылуу кармоочу жайына 48 саатка камалганы белгилүү болгон.
Ага чейин Улукбек Карыбек уулун Бишкектен милиция кызматкерлери кармап, Ош шаарына алып кеткенин досу Кубан Садыров билдирген. Ал Улукбек Карыбек уулу кайсы иш боюнча кармалганы тууралуу так маалымат жок экенин, бирок акыркы жолу Ош облустук төрөт үйүндөгү көйгөйлөр тууралуу видео тартылганын айткан.
Ош шаардык милициянын басма сөз катчысы Абсаттар Тавакалов Ош облустар аралык клиниканын төрөт стационарынын башкы дарыгери блогерге чара көрүүнү өтүнүп кайрылганын "Азаттыкка" ырастаган. Ал 7-июлда белгисиз журналисттер төрөт үйүнө уруксатсыз кирип келип, видео тасмага тартып, жумушка тоскоолдук жаратып жатканын билдирген.
Ош шаардык милициясы билдиргендей, блогерлер төрөт үйүнүн эки кызматкерине баш бербей түртүп кирген, жаңы көз жарган он чакты келинден маек алган. Блогердин аракетинен улам аталган оорукана 37 миңге жакын материалдык зыян тарткан.
Улукбек Карыбек уулунун Ютубдагы каналына 500 миңден ашык адам катталган. Ал мамлекеттик мекемелердеги коррупциялык иштер, тейлөөнүн сапаты боюнча видеолорду жарыялап турат.
12-июлда “Ош облустук оңолбос төрөт үйү” деген материал чыгарган. Анда төрөт үйүндөгү шарттар жана жарандардан акча талап кылуу фактылары тууралуу сөз болгон. (КЕ)
Дагы караңыз
Айсулуу Тыныбекова Венгриядагы рейтингдик мелдеште алтын медал тагындыЛенин аймагына кайра шайлоого беш талапкер арыз бердиУкраин режиссёру Сенцов Франциянын орденин алды АР: Орусиянын түрмөлөрүндө миңдеген украиналык кармалууда