Бишкекте митинг-пикеттерге тыюу салган чечимдин мөөнөтү дагы үч айга узарды. Бул тууралуу бүгүн 3-июлда “Азаттыкка” Биринчи Май райондук сотунан билдиришти.
Мекеменин маалыматына караганда, райондук акимчиликтин тынч жыйындарды өткөрүү жерлерин чектөө тууралуу чечимин мыйзамдуу деп таануу жөнүндөгү арызы 29-июлда каралып, канааттандырылды.
Эми, соттун бул чечимине ылайык, шаардын борбордук бөлүгүндөгү айрым жерлерде митинг-пикет өткөрүүгө 30-сентябрга чейин уруксат жок болот.
31-мартта Биринчи Май райондук соту акимчиликтин райондун айрым жерлеринде митинг-пикет уюштурууга 30-июнга чейин тыюу салган чечимин мыйзамдуу деп тапкан болчу.
Биринчи Май районунун аймагындагы президенттик администрациянын, Улуттук коопсуздук боюнча мамлекеттик комитеттин (УКМК), Жогорку Кеңештин, Жогорку соттун, Орусиянын Кыргызстандагы элчилигинин тегереги, Ала-Тоо аянты, Эркиндик бульварынын Линейная көчөсүнөн Чүй проспектине чейинки тилкеси, Таттыбүбү Турсунбаева атындагы гүлбак жана Иван Панфилов атындагы парктын жанында митинг-пикет өткөрүүгө убактылуу тыюу салган чечим 2022-жылдын март айында кабыл алынган. Анын мөөнөтү улам узартылып келе жатат.
Мындан тышкары Ленин районундагы президенттик резиденция, Бишкек мэриясы, Украинанын, АКШнын элчиликтери жана улуттук филармония жайгашкан жерлер боюнча да тыюу салынганы кабарланган.
Акция өткөрүүнү каалагандар Максим Горький атындагы бакчага чогулса болот. (RK)
Дагы караңыз
Гаагада Украинадагы кылмыштарды иликтөө борбору ачылдыАман калуу аргасы Африкабы? Пригожиндин Беларуста калышы күмөнЫсык чөлдөгү "закым" күн панелдери. Энергетикадагы АКШнын тажрыйбасы Элчи Казакбаев Стамбулда жоголгон кызды издөө уланып жатканын билдирди