Бүгүн, 23-майда Бишкектин Биринчи май райондук сотунда "Вечерний Бишкек" басылмасынын Kaktus.media басылмасына каршы доо арызы боюнча чечим чыкты. Судья Жылдыз Сайдылдаеванын чечимине ылайык, Kaktus.media басылмасы жарыялаган макаладагы маалыматты чындыкка дал келбейт деп таануу тууралуу доо арыз жарым-жартылай канааттандырылды.
Натыйжада, кабарчы 500 миң сом, "Промедиа Плюс" коомдук фонду (басылманын ээси) 500 миң сом төлөөгө милдеттендирилди, мындан тышкары 700 сомдук мамлекеттик пошлина төлөө талабы да коюлду.
Доо арыз Kaktus.media сайтына былтыр 29-декабрда жарыяланган "Вечерний Бишкектин" кызматкерлери гезит 1-январдан тартып жабыларын билдиришти” деген макала жарыяланганына байланыштуу жазылган.
“Вечерний Бишкек” бул макалада так эмес маалымат келтирилгенин айтып, жалпысынан 50 миллион сомдук доо койгон.
Соңку кезде Кыргызстанда көз каранды эмес медиага басым күчөгөнүн серепчилер белгилеп жатышат. Коррупцияны ашкерелеген иликтөөчү журналист Болот Темиров былтыр өлкөдөн күч менен чыгарылды, Next TV телекомпаниясынын жетекчиси шарттуу түрдө үч жылга соттолду, "ПолитКлиника" басылмасына каршы сотко арыз берилди, “Азаттыктын” сайты жарым жылдан бери бөгөттөлүп турат жана аны ЖМК катары жабуу аракети көрүлүүдө.
"Азаттыктын" жана Kaktus.media басылмасынын жабылышын талап кылып социалдык түйүндөргө пикир жазгандардын көбү фейк аккаунттар экенин Bulak.kg сайты аныктап чыккан. (RK)
Дагы караңыз
Өкмөт мамлекеттик ишканаларга көзөмөл күчөтүлөрүн билдирди Ленин округу: шайлоого катышуудан дагы бир талапкер баш тартты Орусияда полиция 100дөн ашуун тажик студентин сабаганы кабарландыАба ырайы: жамгыр жаайт