Министрлер кабинетинин төрагасынын орун басары Эдил Байсалов Маданият, маалымат, спорт жана жаштар саясаты министрлигинин Бишкекте маданий иш-чараларды уюштуруу үчүн 500 миллион сомдук тендер жарыялаганы тууралуу маалыматка комментарий берди. Ал Твиттердеги баракчасына мамлекеттик сатып алуулар порталына чыккан жарыяны "кызматкерлердин биринин катасы болгон", деп жазды.
"Кызматтык териштирүүнүн баштапкы жыйынтыгына ылайык, шаардык спорт департаменттин кызматкерлеринин биринин күнөөсүнүн айынан жарыя бир катар каталар менен жарыяланган. Ал чындыкка коошпойт",-деген Байсалов.
Мунун алдында айрым жергиликтүү маалымат агенттиктер аталган министрлик 500 милилон сомго тендер жарыялаганын, анын алкагында Бишкектеги көрүнүктүү жерлерге үч миң квест-экскурсия уюштуруу каралганын жазышкан.
Социалдык тармактарда шаардагы маданий-туристтик иш-чараларга ири өлчөмдө акча коротуу каралып жатканын сындаган пикирлер көп жазылып жаткан.