Кыргызстандын мурдагы өкмөт башчысы Темир Сариев "Азаттыктын" сайты боюнча чектөөнү тез арада токтотуу керек деп эсептейт. Мындай пикирин ал бүгүн 27-октябрда билдирип, "кабарчыларынын кесиптик деңгээлинин жогорулугу менен айырмаланып туруучу "Азаттык" журналисттик стандарт жагынан башкалар үчүн үлгү" экенин белгиледи:
""Азаттык" маалыматты ачык, айкын берген, көп жылдан берки тажрыйбасы жана тарыхы бар ЖМК. Ар бир бийлик келгенде кандайдыр бир таарынычы болот, бирок бийликтен кеткенден кийин "Азаттык" объективдүү болуп, алардын ой-пикирин берип жүрөт. Ошондо алар "чыканагын тиштеп", "биз "Азаттыкты" туура эмес кылган экенбиз" дешет. ЖМКнын иштөөсү үчүн кандайдыр бир каражат бөлүнүп берилиши бул эл аралык тажрыйба. Андыктан америкалык ЖМК дешкени менен "Азаттыктын" ички саясаты Кыргызстандын кызыкчылыгын коргойт, ал жаңылыктарды тез, таза, ачык чагылдырып берген, элди агартуу жагы да жогорку деңгээлге коюлган ЖМК. Ошондуктан өкмөт жакын арада бул чечимди кайра карап чыгып, өзүнүн чектөөлөрүн алып коюшу керек".
26-октябрда Маданият, маалымат, спорт жана жаштар саясаты министрлиги "Азаттык Медиа" мекемесинин веб-сайтын эки айга жабуу чечимин чыгарды. Министрлик тараткан билдирүүдө "маалымат айдыңында Кыргызстандын улуттук кызыкчылыктарына каршы келген анык эмес (жалган) материалга байланыштуу ушундай чара көрүлгөнү" айтылды. "Эркин Европа/Азаттык" радиосунун президенти Жейми Флай аталган материалда журналистиканын эл аралык стандарттары сакталганын белгиледи. "Азаттык" – каржылык пайда көздөбөгөн, көз каранды эмес "Эркин Европа/Азаттык Үналгысы" корпорациясынын кыргыз кызматы. Кыргызстанда "Азаттык Медиа" деп расмий катталган. (RK)
Дагы караңыз
Жалал-Абадда, Таласта Баткен окуясынын курмандыктары эскерилди "Кемпир-Абадды коргоо" комитетинин ишин Касиет Мамырбай улантарын билдирдиПрезидент Садыр Жапаров Астанага бардыБишкекте журналист кол салууга кабылды