Кыргызстандын Тышкы иштер министрлиги (ТИМ) кыргыз жарандарын Дүйшөмбү аэропортунан кармап, Тажикстандын аймагына киргизбей жаткан учурларга байланыштуу билдирүү таратты.
Анда Кыргызстандын жарандарына карата Тажикстанга кирип-чыгуу тартиби өзгөргөнү тууралуу эл аралык келишимдерде бекитилген тартипте маалымат бериле электиги айтылган.
ТИМ бул жагдайдын себептери такталганга чейин Тажикстанга барбай турууга чакырган. Ошондой эле бул өлкөнүн аймагы аркылуу башка мамлекеттерден кирип же чыкпай турууну өтүнгөн.
Башкы дипломатиялык мекеме Тажикстанда жашап жаткан кыргыз жарандарына кысым көрсөтүү, кодулоо сыяктуу укук бузуу, мыйзамсыз иштер жасалса, Тышкы иштер министрлигинин консулдук департаментине же Кыргызстандын Тажикстандагы элчилигине кайрылууну сунуштайт.
+996 551 312 000 — Кыргызстан ТИМинин консулдук департаменти;
+992887782223 — Кыргызстандын Тажикстандагы Элчилиги.
Тажикстан Кыргызстандын ТИМи тараткан билдирүүгө комментарий бере элек.
16-17-сентябрда кыргыз-тажик чек арасында кан төгүлгөн окуяны Кыргызстандын Тышкы иштер министрлиги "Тажикстандын алдын ала пландаган куралдуу агрессиясы" деп атаган. Дүйшөмбү да Бишкекке ушундай эле айыпты койду. Кыргызстан кол салуудан бери дегенде 62 жаранынан айрылды, алардын кыркы аскер кызматкери. Жараат алгандардын расмий эсеби 200гө жакындады.
Тажикстандын Тышкы иштер министрлиги чек арада 41 жараны каза тапканын, 200 чукулу жаракат алганын билдирди. "Озоди" радиосу өз булактарына таянып, 74 кишинин тизмесин жарыялады, жергиликтүү жашоочуларга шилтеме берип тажик айылдарында да дүкөн, турак жайлар өрттөлүп, талкаланганын жазды. Бул маалыматты башка көз каранды эмес булактан тактоо мүмкүн эмес болууда. (КЕ)
Дагы караңыз
АКШ, Британия, Канада аннексияга жооп кылып, Орусияга жаңы санкцияларды салдыАлмазбек Бейшеналиев эки айга камакка алындыТыванын бийлиги мобилизацияга тартылгандардын үй-бүлөсүнө кой тарата баштадыУкраина НАТОго шашылыш тартипте кирүүгө арыз берди