Мыйзамсыз курал сактоого шек саналып кармалган ишкер Журат Абдуллаев Улуттук коопсуздук комитетинин (УКМК) тергөө абагына эки айга камалды. Бул тууралуу "Азаттыкка" Биринчи май райондук сотунан кабарлашты. Соттун 20-августтагы чечими менен ал 19-октябрга чейин абакта болот.
УКМК 19-августта сүт азыктарын чыгарган "Үмүт жана Ко" ишканасынын ээси Журат Абдуллаев мыйзамсыз курал-жарак, ок-дары жана жардыруучу зат сактаган деген айып менен кармалганын билдирген. Анда кылмышка шектүүнүн үйүн жана иштеген жерин тинткенде "БРДМ-2" үлгүсүндөгү аскер техникасы, танктын үстүнө орнотулган "Калашников" үлгүсүндөгү пулемет баштаган бир топ курал-жарак, ок-дары жана жардыруучу зат алынган.
Атайын кызмат тараткан кабарда Абдуллаев "такай аскер формасын үстүнөн түшүрбөй кийип жүрөрү, агрессияга жакын экени" белгиленген.
"Үмүт жана Ко" фирмасынын ээлери ага-ини Кайрат жана Журат Абдуллаевдер Токмоктогу "Гавайи" ири эс алуу жайынын кожоюндары катары да белгилүү.
Дагы караңыз
Бишкек шаардык соту Адилет Балтабайдын бөгөт чарасын карайт Ульяновскидеги кырсык: ооруканага түшкөндөр кыргыз жарандары Өкмөт башчы Кара-Балтадагы спирт заводун жаңылоону тапшырды Акыйкатчы институту четте өкүлчүлүгүн ачуу демилгесин көтөрдү