Өзбекстандын курамына кирген Каракалпакстан автономдук республикасынын аймагында киргизилген өзгөчө абал режими 21-июлдан тартып алынды. Бул тууралуу Өзбекстандын президенти Шавкат Мирзиёевдин басма сөз кызматы кабарлады.
Анда аталган республиканын Жогорку Кеңешинин кайрылуусун, аймакта коомдук кырдаалдын турукташуусун эске алуу менен президент режимди мөөнөтүнөн мурда токтотуу чечимин кабыл алганы белгиленет. Мурдараак Каракалпакстандын парламенти өзгөчө абал режимин алууну жана тополоңго тиешеси жок жарандарга ырайым кылууну өтүнгөн.
Каракалпакстан борбору Нукустагы окуялар 1-2-июлда болду. Анда демонстранттар менен күч түзүмдөрү кагылып, 500дөн ашык киши кармалган, кийин бир нечеси коё берилген. Алгач 18 киши каза болгону, алардын төртөө укук коргоо органдарынын кызматкерлери экени маалымдалган. Кийин акцияларда жараат алган дагы үч адам каза болуп, курмандыктардын саны 21ге жетти. Бейрасмий маалыматтарга караганда, жараат алгандардын саны миңден ашык.
Өзбекстандын Башкы прокуратурасы Нукустагы тополоңго байланыштуу кылмыш иши козголгонун билдирген.
Нааразылык конституциялык өзгөртүүлөргө каршы тутанган. Жаңы сунушталган долбоордо Каракалпакстандын Өзбекстандын курамындагы "суверендүү республика" деген макамы алынган эле. Мындан сырткары алардын референдум аркылуу өз алдынча бөлүнүү укугу жоюлганы жаткан.
Тополоңдон кийин өзбек парламенти Конституциянын жаңы долбоорунда Каракалпакстандын суверендүү макамын өзгөртүүсүз калтырууну колдоду. Бийлик нааразылык акцияларын күч менен басып, кошумча аскерлер киргизилген. Аймакта августтун башына чейин өзгөчө абал жарыяланган.
Буга чейин Евробиримдик, АКШ, БУУ жана башка бир катар эл аралык уюмдар Ташкентти Каракалпакстандагы окуяларды бейтарап жана тыкыр иликтөөгө чакырган. (ErN)
Дагы караңыз
22-июлдун аба ырайыСадыр Жапаров чек ара аймактарын достук менен ишенимдин көпүрөсүнө айлантууну сунуштадыЖапаров: Ооганстандагы кырдаал аймактын коопсуздугуна таасир этет Рахмон Ооганстандагы кырдаал дайыма көңүл борборунда болушу керектигин айттыШавкат Мирзиёев чек арадагы соода-сатыкты өнүктүрүүнү сунуштады Бердымухамедов: Аймактагы туруктуулукту чогуу камсыздообуз керек Токаев: "Камбар-Ата-1" ГЭСи жөнүндө үч президент алдын ала макулдашты