Украинанын Запорожье облусундагы Москва дайындаган жетекчилик күз айларында аталган аймактын Орусияга кошулуусу боюнча референдум өткөрөрүн жарыялады. Бул тууралуу орусиялык ТАСС маалымат агенттиги тиешелүү администрацияга таянуу менен кабарлады.
Согуш башталгандан бери Запорожье облусунун көпчүлүк бөлүгү Орусиянын аскерлеринин көзөмөлүндө турат. Аймактын борбору – Запорожье шаарын жана башка азыраак жерди гана Киев башкарып жатат.
Кайсы бир аймактарды башка өлкөгө кошушу жөнүндө референдумдар Украинанын мыйзамдарында каралган эмес. Расмий Киев украин жеринин бир бөлүгүн Орусияга өткөрүп берүү маселесин эч качан кабыл албай турганын айтып келатат.
2014-жылдын 18-мартында Украинанын Крым жарым аралын жана Севастополь аймагын анда жасалма референдум өткөрүү менен Орусия өзүнө кошуп алган. Украина жана дүйнөнүн көпчүлүк өлкөлөрү бул референдумду тааныган эмес жана процессти аннексия деп эсептейт.
2022-жылдын башында Орусия Украинага кол салгандан кийин Кремль өз планында жаңы аннексия жок экенин маалымдаган. Кийинчерээк ар кайсы катмардагы орус аткаминерлери басып алынган аймактарда референдум өткөрүп, Орусияга кошуп алуу чакырыктарын таштап келатышат. (ErN)
Дагы караңыз
Шри-Ланканын президенти кызматтан кеткенин Сингапурдан жарыяладыАКШ менен Израилдин лидерлери “Иерусалим декларациясына” кол коюштуАскердик кылмыштарга айыпталган ирандык жаран Швецияда өмүр бою камалдыМинистр 1-2-класстын окуучуларына баа коюлбай турганын билдирди