Прокурор Атамбаевди 12 жылга эркинен ажыратууну сурады

Бишкектин Биринчи май райондук сотунда Октябрь окуясы боюнча соттук териштирүү бүтүп, мамлекеттик айыптоо менен адвокаттардын жарыш сөзү башталды. Анда мамлекеттик айыптоочу тарап Алмазбек Атамбаевди Кылмыш-жаза кодексинин 278-беренеси (“Массалык баш аламандыктар”) боюнча күнөөлүү деп таап, 12 жылга абакка кесүүнү сурады.

Прокурор Атамбаевдин ошол кездеги кеңешчиси Фарид Ниязовду, мурдагы жансакчы Канат Сагымбаевди Кылмыш-жаза кодексинин 278-беренеси (“Массалык башаламандыктар”) менен күнөөлүү деп таап, жети жылга кесүүнү, Социал-демократтар партиясынын лидери Темирлан Султанбековду Кылмыш-жаза кодексинин 278-беренеси (“Массалык башаламандыктар”) жана 374-беренеси (“Бийлик өкүлүн коркутуу же ага карата зомбулук”) боюнча тогуз жылга эркинен ажыратууну сурады.

Прокурор ички иштер министринин мурдагы орун басары Курсан Асанов менен "Туран” партиясынын лидери Жеңиш Молдокматовду Кылмыш-жаза кодексинин 278-беренеси “Массалык башаламандыктар” (2021-жылдагы редакция менен - ред.) жана Жазык кодексинин 257-беренеси “Атуучу куралды уурдоо же опузалап алуу” (2017-жылдагы редакциясы менен - ред) күнөөлүү деп таап, тогуз жылга абакка кесүүнү соттон өтүндү.

Октябрь окуясына байланыштуу аты аталган жети кишиге айып тагылган. Мындан сырткары Өмүрбек Бабановдун иши өзүнчө бөлүнүп тергелди.

28-июндагы сотко Атамбаев менен Бабановдон башка бардык шектүүлөр катышты. Прокурор айыпталуучу сот жараянына катышуусу зарыл экенин айтып, отурумдун түштөн кийинки бөлүгүнө мурдагы президент Алмазбек Атамбаев алып келинген. Атамбаев буга каршы болуп, буту менен темир тосмону тепкиледи. Жыйынтыгында кайтаруучулар (конвойлор) аны сот залынан алып чыгып кетишти.

2020-жылдагы Октябрь окуяларына байланыштуу тергөөнүн материалында Атамбаевдин 2020-жылы 5-октябрдын түнү камактан мыйзамсыз бошоп кеткени, андан кийин Бабанов, Султанбеков, Сагымбаев, Молдокматов жана Ниязов баштаган тарапташтары менен алдын ала сүйлөшүп алып, бийликти басып алууга аракет кылганы көрсөтүлгөн. Алар 9-октябрда “Медиа Форум” имаратынын алдына чогулуп, андан кийин "Ала-Тоо" аянтына келгени, ал жерден жапырт башаламандыкты баштаганы белгиленген.

2020-жылдын 5-6-9-октябрындагы жапырт башаламандык боюнча баштапкы соттук угуу былтыр октябрь айында башталган. Айыпталуучулар Октябрь окуясы боюнча кылмыш ишинде саясий өңүт бар экенин айтып келишет. (BTo/КЕ)

Дагы караңыз