Украинанын куралдуу күчтөрү согуштун 110-күнүндө орус күчтөрү басып алган миңден ашык украин шаарларын жана айылдарын бошотту. Бул тууралуу украин президенти Владимир Зеленский түнкү салттуу кайрылуусунда кабарлады.
Мурдараак ал Орусиянын аскерлери Украинанын 3 миң 620 айылына киргенин, алар украин жеринин 20% ашыгын ээлеп турганын айтты. Бошотулган айылдар Житомир, Киев, Чернигов, Сумы, Харьков, Херсон облустарында.
Жаңы кайрылуусунда президент Зеленский Батыш өлкөлөрү жөнөткөн куралдар толук келсе, алар орус күчтөрүн артка сүрүп чыгарын, ал тургай Крымды да бошоторун айтты.
“Бизде алдыга жылгандан башка арга жок. Бардык аймагыбызды бошотушубуз керек. Баскынчыларды биздин бардык облустарыбыздан кууп чыгышыбыз керек. Биздин фронтубуз 2,5 миң чакырымга созулганы менен стратегиялык үстөмдүк биз тарапта болуп жатат. Биз украин желеги түшүрүлгөн ар бир шаарга, ар бир айылга жетебиз. Барып, ар бир үйдө тууларыбызды көтөрөбүз”, - деди Владимир Зеленский.
Орусиянын күчтөрү украин жергесине 24-февралда басып кирген. Ушул убакка чейин орус аскерлери Украинанын Донецк менен Луганск облустарынын көпчүлүк бөлүгүн, Херсон, Запорожье, Харьков облустарынын айрым аймактарын ээлеп алган. Катуу чабуул Донецк менен Луганск аймактарында, анын ичинде өзгөчө Северодонецк жана Лисичанск шаарында жүрүүдө. Москва Украинанын Крым жарым аралын 2014-жылы аннексиялап, өзүнө кошуп алган. (ErN)
Дагы караңыз
Украинадагы согушта каза тапкан кыргызстандык милициянын отставкадагы майору болгонАхмадзода: Чек арадагы ок атышууну эки өлкөнүн Аскер прокуратуралары иликтейтЕвробиримдик Орусиянын дагы үч банкын SWIFT системасынан өчүрдү