Памирликтер менен Алай элин бириктирген Нооруз

Нооруз памирликтер менен жергиликтүүлөрдү
бириктирген майрамга айланган.

Шарты катаал, кышы жети айга созулган айылда эч нерсе өспөйт. Марттын жыйырмасы
болсо да, Талды-Сууда калың кар кете элек.

Айылдын кире беришинде памирлик кыргыздар үчүн 11 үй курулган. Азыр
мында 17 үй-бүлө жашап жатат.

Күмүшай Орозбек кызынын күйөөсү Алайдагы памирлик кыргыздардын ханы (башчысы).
Күмүшай кызы менен таң эрте суу ташып, майрамдык дасторконго даярдыкты баштады.

Күмүшайдын келини Дөөлөт Ноорузга карата памирликтердин улуттук тамагы
каттамага камыр жайып жатат. Каттама - жука жайылган камырдын бетине,
астына май сүйкөп бышырылган нан.

Памирлик кыз-келиндер каттаманы казанда бышырып көнүшкөн. Кыргызстанга
келгенден бери алар тиричилик техникасын да өздөштүрүп жатышат.

Памирлик кыз-келиндер улуттук кийимдерин кийип, майрамдык салтанатка
жөнөштү. Алар кийиминде кызыл өңгө басым жасашат.

Талды-Сууда 2000ден ашык калк жашайт. Жазды кеч тоскон айыл Нооруз
майрамына өзгөчө даярданат. Майрам айылдагы чакан маданият үйүндө өтөт.

Айылдагы элечек кийген апалар айыл өкмөт башчысы Турусбек Таевди май токоч, сары
май менен тосуп алышты.

Талдысуулуктар Нооруздун урматына улуттук тамак-аш көргөзмөсүн
уюштурушту. Чакан залда тамак-аштын 60тан ашык түрү дасторконго
жайылды.

Эттен даярдалган улуттук тамактар. Нарын, күлазык, олобо, жөргөм, ташкордо, быжы, бешбармак, куурдак.

Актан даярдалган тамактар. Айран, сүт, каймак, сары май, сүзмө, курут, быштак, кымыз.

Дасторкондун жанында улуттук кийимчен апалар тамак-аштын жасалышы
жана тарыхы менен тааныштырып жатышат. Мисалы, күл азык мурун узак
сапарга, аӊ улоого, жүрүшкө, казатка чыгаарда даярдалчу.

Айылда дан өсүмдүктөрү катаал шартка байланыштуу өспөйт. Аялдар буудайды
базардан сатып алып келип, үйдө өндүрүп, түнү менен сүмөлөк бышырышкан.
Мал менен жан баккан айылга аптасына бир азык-түлүк сатып
келишет.

Көргөзмөдөгү апалар. 

Көргөзмөгө каттама алып келген Күмүшай Орозбек кызы неберелери менен.

Токчулук, дасторкон толо тамак-аш.

Дасторкондун көркүн ачкан патыр нан. 

Дасторкондондогу дүйүм даамды айылдагы алты көчөнүн тургундары өз-
өзүнчө даярдашкан. 

Бүгүн мыкты дасторкон үчүн көчөлөр арасында таймаш уюштурулду.

Калыстар тобу таймаштын жеңүүчүсүн аныктай албай талашып-тартышып жатат. Алар катышуучулардын ар бири күн-түн дебей эмгектенип, майрамга мыкты даярданганын белгилешти.

Маданият үйүндө айылдык мектептин мугалимдери, окуучулары чакан концерт да уюштурду. Башка шаан-шөкөт, маданий жашоосу жок айылдыктар концертти көрүп, кубанып отурушат.

Кыргыз бийин бийлеген памирлик жеткинчектер.

Памирлик кыздар Кыргызстанга келгенден кийин мектепке бара башташкан. Бүгүн алар да курдаштары менен музыкалык номер даярдап, эл алдына чыгышты. 

Концертке келген памирлик келиндер. Памирде алар Нооруз майрамын белгилешкен эмес. Ошондон улам маданий иш-чараны таң калуу менен карап отурушту.

Майрамда балдар да кубанып жатышат.

Айылдын байбичеси Алима Насирова жаздын келишин, токчулукту,
молчулукту тилеп отурат.

Калың карга карабай Ноорузду белгилегендер.