Жогорку Кеңештеги "Бүтүн Кыргызстан" фракциясынын лидери, депутат Адахан Мадумаровдун ишине байланыштуу түзүлгөн комиссия Башкы прокуратуранын аны жоопко тартуу үчүн уруксат берүү сунушун четке какты. Бул тууралуу "Азаттыкка" депутат Исхак Масалиев билдирди. Эми комиссия чечимдин долбоорун Жогорку Кеңештин жалпы жыйынына алып чыгат.
"Комиссиянын чечимин Жогорку Кеңешке жөнөтүп жатабыз. Ал жактан кандай чечим кабыл алынат алдын ала айткандан корком", - деди Масалиев.
Башкы прокуратура февралда Мадумаровго карата “Чыккынчылык” беренеси менен кылмыш иши козгогону белгилүү болгон. Башкы прокурор Курманкул Зулушев Мадумаровду жоопко тартууга макулдук берүү өтүнүчү менен парламентке кайрылган. Буга байланыштуу депутаттык комиссия түзүлүп, алар маселени бир ай ичинде карап чыкмай болгон.
Кийин Башкы прокуратура кылмыш ишин “Мамлекетке чыккынчылык” беренесинен “Кызмат абалынан кыянаттык менен пайдалануу” беренесине өткөрткөн.
Адахан Мадумаров кылмыш ишин саясий куугунтук катары баалап келет.
Ал 2009-жылы Коопсуздук кеңешинин катчысы болуп турган кезде кол койгон кыргыз-тажик чек арасы тууралуу протоколдон улам 14-январдан тарта Башкы прокуратурада күбө катары бир нече жолу сурак берген.
2009-жылы Ош - Баткен - Исфана жолун оңдоого жана көпүрө куруу үчүн 275 метр узундуктагы беш гектар жерди тажик тараптан 49 жылдык мөөнөткө ижарага алуу боюнча протоколго кол койгон. Депутат документ юридикалык күчкө ээ эмес экенин кайталап келет.
Президент Садыр Жапаров Төрт-Көчө тилкеси боюнча кол коюлган протоколду “чыккынчылык” деп атаган.
Дагы караңыз
Нарын дарыясына агып кеткен тогуз жаштагы бала изделүүдөКыргызстанда пенсиянын көлөмүн 50% чейин көтөрүү пландалууда Мирлан Ураимов эч жакка чыкпоо тууралуу тил кат менен бошотулдуЖогорку Кеңеш жыйынында Кумтөр маселеси каралат