“Ата Мекен” партиясынын лидери Өмүрбек Текебаев анын уюк телефонун уурдаган деген шек менен кармалган Ыбыш Эшпаевге доосу жок экенин билдирип, 3-декабрда Бишкек шаардык милициясына тосмо арыз жазды.
Токмок шаарынын тургуну Ыбыш Эшпаев 1-декабрда Бишкекте Өмүрбек Текебаевге кол салган албууттанган топтун арасында болчу жана 2-декабрга караган түнү шаардык милиция тарабынан кармалган.
Иш Жазык кодексинин “Адамдардын тобу же алдын ала сүйлөшүү боюнча адамдардын тобу тарабынан тоноо” беренеси менен иликтенип жаткан.
Өмүрбек Текебаевге 1-декабрда Бишкекте кол салуу болгон. Топ адам саясатчынын уюк телефону менен көз айнегин алып кеткен. Ыбыш Эшпаев кармалгандан кийин телефонду өз эрки менен кайтарып берген.
Башта Текебаев бул окуяны “саясий террор” деп атап, өзүнүн ишмердиги жана шайлоого байланыштуу позициясы менен байланыштырган. “Ата Мекен” партиясы лидерине болгон кол салууну саясий репрессия жана оппозицияны коркутуп-үркүтүү катары кабыл алганын билдирген.
Өмүрбек Текебаевге кол салууга катышкандар 3-декабрда партиянын кеңсесине барып, саясатчыдан кечирим сурашты. Алар максаттуу түрдө Текебаевге кол салуу үчүн чогулбаганын, 1-декабрда өлкөдө тынчтыкты талап кылган акцияга келип капыстан саясатчы менен чыр чыгып кеткенин айтышты.
Текебаев бул окуяга юридикалык болбосо да саясий баа берилиши керектигин билдирди. (BTo/KS)
Дагы караңыз
АКШ Орусияны аскерлерин украин чек арасынан ары чыгарууга чакырдыБШКнын мүчөсү Кайрат Маматов УКМКда сурак берип чыктыКриштиану Роналду тарыхта 800 гол киргизген алгачкы футболчу болдуАКШ: Конгресс өкмөттүн ишинин токтоп калуусунун алдын алды Баткенде жөнөкөй тартипте жарандык алууга 120дан ашык арыз түштү Текебаевге кол салууга катышкандар саясатчыдан кечирим сурашты