Айрым партиялар менен кыймылдар "Намыс жана Тартип" коалициясын түзүп, парламенттик шайлоого бирге бармай болду. Коалицияга "Ар-Намыс", "Улуттар" биримдиги", "Кыргызстан Элдик-Демократиялык саясий партиясы" жана "Мекендештер", "Элдик көзөмөл", "Көзөмөл" "Мекен сакчысы" кыймылдары кирген. Бул маалыматты "Ар-Намыс" партиясынын лидери Феликс Кулов "Азаттыкка" тастыктады.
Анын айтымында, партия лидерлери Феликс Кулов ("Ар-Намыс"), Мелис Мырзакматов ("Улуттар" биримдиги"), Артур Медетбеков ("Кыргызстан Элдик-Демократиялык саясий партиясы") жана кыймылдын жетекчилери Дмитрий Феодоров ("Мекендештер"), Кубанычбек Исабеков ("Элдик көзөмөл"), Саитжан Эратов ("Мекен сакчысы"), Айбек Турганбаев ("Көзөмөл") 4-октябрда келишимге кол коюшту.
"Тизмеге эки-үч партия, кыймылдын мүчөлөрү кирет, ушундай принцип менен барабыз. Бир гана "Улуттар биримдигинен" болбойт", - деди Кулов.
Кыргызстанда парламенттик шайлоо 28-ноябрда өтөт. Бул ирет Жогорку Кеңешке 90 депутат келет. Анын 54ү партиялык система менен шайланса, 36 депутат бир мандаттуу округдан шайланат. БШКга 75 партия шайлоого катышуу ниетин билдирип, арыз берген. Алардын канчасы каттоодон өтүп, шайлоого катышары азырынча анык эмес.
Соңку парламенттик шайлоо Кыргызстанда 2020-жылдын 4-октябрында өткөн. Шайлоо тыянагына нааразылар эртеси күнү Бишкекте митингге чыгып, арты өлкөдө бийлик алмашууга алып келген.(КЕ)
Дагы караңыз
Физика боюнча Нобел сыйлыгы тапшырылдыКара-Кече кенин "альфачылар" кайтаруудаПарламент комитетинде Финтех боюнча мыйзам четке кагылдыОрусия: абактардагы кыйноолордун видео архиви ачыкка чыктыКыргызстандын эң мыкты мугалимдери аныкталды