10-августта Казакстанда COVID-19 илдети 8 245 адамдан аныкталып, 154 киши каза болду. Бул тууралуу өлкөнүн Саламаттык сактоо министрлигинин 11-августтагы билдирүүсүндө жарыяланды.
Казакстандын саламаттык сактоо министри Алексей Цой вирустун жайылышы бул айдын башында бир топ жайлап, бирок соңку эки күндө кайрадан күч алганын билдирди. Анын айтымында, азыр COVID-19 бир күндө 7 миңден кем эмес адамдан табылууда.
Өлкөнүн бардык аймактары менен шаарлары «кызыл зонага» киргизилди. Коронавирустун жайылышы боюнча Алматы шаары алдыга чыгып (1493), андан ары баш калаа Нур-Султан (1153), Караганда (1125), Атырау (618), Шымкент шаары (574) жана Актөбө (304) катары менен куушуп келе жатышат. Калган аймактарда илдет аныкталгандар 300 кишиден төмөн.
Пандемия башталгандан бери Казакстанда бул илдет 656 миң кишиден аныкталып, 7 103 киши көз жумду.
Азыркы учурда Казакстан боюнча 112 миң адам дарыланып жатканы, 30 миң пациент ооруканага жатып, анын ичинен 1 808 адамдын абалы оор, 451 киши абдан оор абалда, дагы 215 адам жасалма дем алдыруу аппаратына кошулганы кабарланды.
Дагы караңыз
Бишкек, Ош жана Токмок шаарларында мэр шайлоо 26-августта өтөтАрка: жаңжалда чыгым тарткан соодагерлердин үмүтүВладикавказ: ооруканада кычкылтек жетпей 11 бейтап каза болду12-августтун аба ырайыШаардык сот Нарымбаевди абакта калтырды