Бишкек, Чолпон-Ата, Каракол жана Ош шаарында калкты коронавируска каршы эмдөөчү нөөмөт пункттар күнү-түнү иштейт. Бул тууралуу Министрлер кабинетинин төрагасынын орун басары Жылдыз Бакашова кабарлады.
Анын айтымында, Sinopharm вакцинасы бүгүн, 12-июлда өлкөнүн аймактарына жеткирилет. Бул үчүн атайын унаа жана вакциналарды сактоочу муздаткычтар каралган.
Калкты тез арада эмдөө үчүн эл көп чогулган парк, аянттарга атайын чатырлар тигилет.
11-июлда Кыргызстанга Кытайдан 1,2 миллион доза Sinopharm вакцинасы келди. Министрлер кабинетинин төрагасы Улукбек Марипов июль айынын аягына чейин дагы 1,2 миллион доза Кытайдан вакцина келерин кабарлады.
29-мартта башталган коронавируска каршы эмдөөдөн өлкө боюнча 130 миңге чукул киши өттү. (BCh)