Жогорку Кеңештин 2-декабрдагы кезексиз жыйынында мамлекет аралык макулдашууларды ратификациялоо боюнча мыйзам долбоорлору каралып, добуш берүүгө жөнөтүлдү.
Парламенттин басма сөз кызматы билдиргендей, жыйында Евразия Экономикалык Биримдиги менен Сербиянын ортосундагы эркин соода жүргүзүү зонасы тууралуу макулдашууну ратификациялоо жөнүндө мыйзам долбоору экинчи окууда каралды. Макулдашууга 2019-жылдын 25-октябрында Москва шаарында кол коюлган.
Ошондой эле бүгүнкү жыйында былтыр Ереван шаарында кол коюлган, 2014-жылдын 29-майындагы Евразия Экономикалык Биримдиги жөнүндө келишимге өзгөртүү киргизүү жөнүндө протоколду ратификациялоо боюнча мыйзам долбоору да экинчи окууда добуш берүүгө жиберилди.
Мындан тышкары 2018-жылдын 2-ноябрында Астана шаарында кол коюлган өзөктүк авария же радиациялык авариялык кырдаал келип чыккан учурга карата даярдыкты камсыздоо жана алардын кесепеттерин жоюуда өз ара жардам берүү боюнча КМШ мамлекеттеринин өз ара кызматташтыгы тууралуу мыйзам долбоору үчүнчү окууда каралды.
Быйыл 4-октябрда өткөн парламенттик шайлоонун баштапкы жыйынтыгына нааразылык акциялары жапырт тополоң менен коштолуп, өлкөдө бийлик алмашкан.
22-октябрда Жогорку Кеңеш Конституцияны өзгөртмөйүнчө парламенттик шайлоону өткөрбөй туруу жөнүндө мыйзам кабыл алган. Ага ылайык депутаттар парламенттин мөөнөтүн 2021-жылдын июнь айына чейин узарткан.
Депутаттар муну мыйзамдуу кадам деп түшүндүрсө, бир катар коомдук ишмерлер, саясатчы, юристтер парламенттин мөөнөтү мыйзамсыз узартылганын билдирип келишет. (NT)
Дагы караңыз
Текебаев: «Ата Мекен» өз идеясы үчүн иштеп жататФинпол Кең-Сай конушунда 13 млн. сомдук жумуш аткарылбай калганын аныктадыБашкы прокуратура «Ынтымак» сейил багынын курулушундагы мыйзам бузуу боюнча кылмыш ишин козгодуТаласта 4-декабрда күн-түн бою тынбай «Манас» айтылат10-январда референдум өткөрүү тууралуу мыйзам долбоору БШКнын талкуусуна коюлду