Багбандын тилеги, госпиталдагы таштанды

"Азаттык" аймактардагы кабарчылар жиберген сүрөт жана видеолор топтомун жарыялоону улантат.

Кыргызстанда бир суткада эки мектеп директору каза болду.

Бишкектин Көлмө конушундагы №78 гимназия мектебинин директору Элнура Музаева 14-июлга караган түнү 54 жашында ооруканада көз жумду.

Маалыматка караганда, 12-июлда Музаеванын күйөөсү Уранбек Кубатбеков өпкөсү сезгенип, мурдагы “Ганси” базасындагы стационарда каза болгон.

Музаева ошондон кийин өзү инсульт болуп, шейшембиге караган түнү реанимациядан үзүлгөн. Өпкөсүн рентгенге тарттырганда 80% пневмония экени аныкталган.

14-июлда Ош шаарынын Киров атындагы №4 орто мектебинин директору, 61 жаштагы Гүлнара Туташева ооруканада каза болду. Шаардык билим берүү башкармалыгынын маалыматына караганда, ал эки өпкөсүнөн пневмония болгон, ага чейин кант диабети бар болчу.

Баткен

Тажикстан менен чектешкен Лейлек районундагы суусуз жаткан 60 гектар жерге 50 миңдей көчөт тигип, чек араны бак менен бекемдөөнү колго алган багбан келечекте райондун экономикасын көтөрүүнү максат кылууда. Кулунду айылындагы жаштарды кооперативге бириктирип, 25 жылдан бери пайдаланылбай жаткан жерди иштетип, мөмө-жемишти экспорттоого аракеттенип жатышат.

Чек арада бак тиккен балбандын тилеги

Ушу тапта Баткенде өрүк бышып, элдин көпчүлүгү бак ичинде түшүм жыйноо менен алек. Орто эсеп менен Баткен облусунда 120 миң тоннадай өрүк өндүрүлөт. Баткердик багбандар быйылкы пандемия шартында өрүктүн баасы кеткен чыгымды жаап, эмгегибиз акталабы деп түйшөлүп турушат. Облуста 8000 гектардан ашуун жердеги өрүк багынан сегиз млрд сомго чейин киреше түшөт деп эсептелген.

Баткен: пандемия маалында өрүктүн баасы кандай болот?

Ош

Блогер Адыл Акжол уулу Ош шаарындагы Тез жардам кызматынын бекетинен тартылган видеону "Фейсбуктагы" баракчасына жарыялады. Түз эфирде жазылган видеодо блогер Ош шаардык Тез жардам кызматынын улук дарыгери Замирбек Жакыповду кепке тартып, мекеменин абалы тууралуу суроолорго жооп алган.

Ысык-Көл

Ысык-Көл облусунун Кара-Ой айылынын тургуну Белек Осмонканов буга чейин мейманкана иштетип келген. Бул жылы пандемиядан улам эс алуучулар келбей, бакчасындагы алма багын карап, карагат терүү менен алек.

Ысык-Көлдөгү Белектин "Алтай" карагаты

Чүй

Өзгөчө кырдаалдар министрлиги “Семетей” госпиталынын имараты (мурдагы «Ганси» авиабазасы) жайгашкан аймакта тиричилик жана медициналык таштандыларды чогултуу, чыгаруу жана жок кылуу иштери жүргүзүлүп жатканын маалымдады.

Андан сырткары аймакты дезинфекциялоо иштери, кошумча таза суу менен камсыздоо, бейтаптарга, медициналык кызматкерлерге шарт түзүү аракеттери жүрүп жатканын билдирди.

13-июлда ыктыярдуу түрдө элге жардам берип жүргөн тамада Эрнест Бөрүбаев аталган жайда оор абалда жаткандар менен башкалар аралашып жүргөнүн, ар кандай таштандылар чыгарылбай жатканын видеого тартып Интернетке жарыялаган. Бөрүбаев “Семетей” госпитал жайы көзөмөлсүз калганын айтып, "таштандылар кайда төгүлүп жатат?" деп суроо салган.

Чүйдө коронавирусту жана пневмонияны алдын алуу максатында үймө-үй кыдыруу уюштурулат. Бул тууралуу 14-июлда Коронавируска каршы республикалык ыкчам штаб кабарлады.

Штабдын маалыматына караганда, облус жетекчиси Алтынбек Намазалиев чыгарган буйрукка ылайык, кыдыруу учурунда ооруп жаткандар аныкталып, аларга кеп-кеңеш берилет.

Бишкек

Бишкекте күндүзгү стационарда иштеген Иса Ахунбаев атындагы Медициналык академиянын студенти пневмониядан каза болду. Жакындары ыктыярчы “кызыл зонада” иштегенине 11 күн болгонун айтышты.

Соцтармактарда ыктыярчылардын оор шарттарда иштеп жатканын белгилеген видео кайрылуулар тарап, алардын коопсуздугуна байланыштуу маселе көтөрүлө баштады. 14-июлда президент Сооронбай Жээнбеков дарыгерлерге жардам берген ыктыярчылардын мээнетин белгилеп, алардын эмгеги баа жеткис экенин кошумчалады.

Ак халатчан ыктыярчы кыз көз жумду