Үмүтүн үзбөгөн Зардалы

Өткөн кылымдын 60-жылдары аймакта жашоого ыңгайсыз деп көчүрмө жүрүп, Баткен шаарына жакын Карабак айылына келишкен. Ата жайынан кетүүнү каалабаган 30-40тай үй-бүлө калып, ушул күнгө чейин турмуш кечирүүдө.

Бул айылда мезгилинде бир нече миң киши жашап, 3-4 бригада болгон.

Зардалы айылы коомчулукка мындан 17 жыл мурда "Өзбекстан ислам кыймылынын" жоочулары басып киргенде кенен таанылган.

Баткен окуясынан кийин Зардалыга чек ара бөлүмчөлөрү жайгашып, жашоо кайра жандана баштаган десек болот.

Айылда туруктуу 40ка чукул үй-бүлө болгону менен жай айларында жайлоолоп бир топ эле киши барат.

Мындан тышкары Кожо ашкан айылына да каттам жанданат. Зардалыга жетүү үчүн чоң жол бүткөн Жоопая айылынан ары күчтүүрөк автоунааң болсо Дөгмөн ашуусун ашып барсаң 20-30 чакырымдай жүрөсүн, ал эми жөө жалгыз аяк жол менен 10 чакырымдай аска боорлой кеткен чыйырда жүрүүгө туура келет.

Анын 4 чакырымдайы өтө кооптуу.

Бир тарабың аска болсо, ылдыйда Көк дарыя буркан шаркан. Бул айылда негизги унаа катары эшектерди пайдаланышат.