Жерге-Талдагы уникалдуу музей

Жерге-Талдын Жайылган айлы жакында «Чорсу» деп тажик тилиндеги аталышка алмаштырылган. Мына ушул айылда ардагер агартуучу, тарыхчы, Хамид Боронов Тажикстанда согуш башталган коогалуу мезгилде аймактын тарыхын сактап калыш үчүн мектептин бир бөлмөсүндө музей ачып, ал жерде бүгүнгө карата үч миңден ашык экспонат топтолду. 76 жаштагы Боронов аксакал элдик оозеки чыгармаларды да жыйнап келет. Ал түзгөн сүрөттүү альбомдор Жерге-Талдын, бул жактык таанымал адамдардын башка эч жерде жок антологиясы болуп саналат. Бийликтердин чечими менен музейди көчүрүү үчүн жаңы имараттын пайдубалы салына баштады. Тажикстандагы бул уникалдуу музейге Жаңыл Жусупжан баш бакты.