АКШнын жаңы шайланган президенти Дональд Трамп Орусия менен мамилелерди калыбына келтирүү тууралуу байма-бай билдирүүлөрдү жасап келген. Өткөн аптада Times жана германиялык Bild гезиттерине курган маектеринде билдиргендей, ал АКШнын жана Орусиянын өзөктүк арсеналдары “олуттуу кыскарышын” көздөп турат. Мындан улам ал экономикалык санкциялардын жоюлушу үчүн орус президенти Владимир Путинге өзөктүк арсеналдарды кыскартууну сунушу кылышы мүмкүндүгүн ишара кылган.
Радикалдуу ураандар менен коштолгон шайлоо өнөктүгүн жүргүзгөн Дональд Трамп кызматына киришээр замат убадаларын четинен аткара баштарын айтып келген. Бүгүн ал Барак Обамадан президенттик кызматты өткөрүп алаары менен бир нече жарлыкка кол коет деп күтүлүүдө. Анын ичинде Обама киргизген бир нече чаралар бар болгонун Трамптын басма сөз катчысы Шон Спайсер билдирди.
Трамп 12 мамлекет кол койгон Транс-Тынч океан экономикалык келишиминен чыгаарын билдирген. Ал ошондой эле миграцияны чектеп, АКШ менен Мексиканын чегине дубал куруларын айткан.
Reuters агенттигинин маалыматына ылайык, Трампка кол коюуга 200гө жакын жарлык жиберилет.
