Саясий көз караштары мурунку президент Барак Обаманыкынан кескин айырмаланган Трамп бийликке келгенден кийин АКШда жана анын тышкы саясатында кандай өзгөрүүлөрдү күтүүгө болот?
Талкуунун катышуучулары: Аскарбек Мамбеталиев, билим берүү боюнча адис, Даниел Кадырбеков, Жапониядагы Кобе университетинин магистранты.
Дональд Трамптын сөзү 16 мүнөт 12 секундага созулду. Жаңы президент коомду бириктирип, жаңы көпүрөлөрдү, жолдорду куруп, исламчыл терроризмди жеңип, бийликти вашингтондук элитадан карапайым калкка өткөрүп берүүнү убада кылды. Серепчилер бул кайрылуусунда Дональд Трамп шайлоо өнөктүгү маалындагы негизги убадаларын кайталаганын белгилешүүдө.
CNN каналынын журналисттеринин айтымында, АКШнын жаңы президентинин сөзү буга чейинки ант берүү аземдеринде айтылгандардын ичинен эң радикалдуусу болуп калды. Трамптын билдирүүсү популисттик маанайда болгону медиада белгиленүүдө.
Дональд Трамптын айтымында, аземдеги сөздөрүн ал өзү жазган.