Орусияда президент Владимир Путиндин Украинадагы согушка катышкандарга жана алардын үй-бүлө мүчөлөрүнө паспорт берүүгө жол ачуучу жарлыгына ылайык, быйыл жыл башынан бери 3344 чет өлкөлүккө орус жарандыгы берилди. Бул тууралуу Орусиянын Ички иштер министрлигинин расмий өкүлү Ирина Волк билдирди.
Бул аскер кызматкерлеринин гана саныбы же алардын жакындарын кошкондогу жалпы көрсөткүчпү, Волк тактап айткан жок.
Путин орус армиясы же орусиячыл аскердик түзүмдөр менен бир жылдык келишим түзгөн аскер кызматкерлерине жарандык ыйгаруу тууралуу мыйзамга 2022-жылы кол койгон.
Украинага каршы согуш ачкандан бери Орусияда бул өлкөнүн паспортун алып, бирок аскердик каттоого турбай койгондорду жарандыктан ажыратуу боюнча да мыйзам кабыл алынган. Быйыл сентябрь айында Ички иштер министрлиги (ИИМ) бул мыйзам аткарыла баштаганын билдирген.
Орусиянын жарандыгын алган чет өлкөлүктөрдү паспортунан ажыратууга негиз болуучу себептер тизмеси кеңейтилген. ИИМдин маалыматына караганда, быйыл сегиз айда 1117 киши Орусиянын жарандыгынан ажыратылды.
Украинада 5-ноябрда өлкөнүн түштүк-чыгышындагы Запорожье шаарында Орусиянын ракеталык соккусунан кеминде алты кишинин өмүрү кыйылды, дагы тогуз киши жараат алды. Бул тууралуу аймактын администрация башчысы Иван Федоров Telegram каналына жазды.
Ракета түшкөн жерде өрт чыкканы, орус аскерлери бутага инфраструктура объектисин алганы белгиленди.
Согуш башталганга чейин калкы 700 миңдей болгон бул шаар Запорожье атомдук станциясынан болжол менен 55 чакырым аралыкта жайгашкан. Европадагы ири АЭС Орусия Украинага кол салган 2022-жылдын февралынан бери орус тараптын көзөмөлүндө турат.
Борбор калаа Киевдин мэри Виталий Кличко шаар Орусиянын учкучсуз учактарынын эки толкун болуп урулган соккусуна кабылганын билдирди.
Өлкөнүн экинчи ири шаары Харьковдо эки аял жараат алганын мэр Игорь Терехов маалымдады.
Орусия соңку апталарда Киев, Харьков жана башка шаарларды дээрлик күн сайын аткылоодо.
Украинанын Аскердик-аба күчтөрү Одесса, Киев, Сумы, Полтава, Житомир, Черкасск, Чернигов жана Хмельницкий облустарына учурулган 79 согуштук дрондун 48и атып түшүрүлгөнүн кабарлады.
Өлкөнүн дан жана башка продукциясы экспорттолуучу негизги порту Одессада "Кинжал" ракеталарынан экөө атып түшүрүлдү.
Ал эми Орусия Украина менен чектеш тилкесиндеги Брянск облусунда украиндердин учкучсуз алты учагы кармалганын билдирди.
Украинанын президенти Владимир Зеленский Орусиянын Украина менен чектеш Курск облусунда Түндүк Кореянын аскерлеринин саны 11 миңге жеткенин айтты. Ал буга өноктөштөрү жетиштүү деңгээлде реакция кылбай жатканын билдирди.
Европа Биримдигинин тышкы саясат боюнча башка комиссары Жозеп Боррел 4-ноябрда Түштүк Кореяны Украинаны колдоону күчөтүүгө чакырды.
1-ноябрда Москвада Орусиянын тышкы иштер министри Сергей Лавров менен жолугушууда бул өлкөнүн башкы дипломаты Цой Сон Хи түндүк кореялык аскерлер Орусияга жөнөтүлгөнү тууралуу билдирүүлөр боюнча түздөн-түз эч нерсе айткан эмес, бирок Москваны согуш башталгандан бери колдоп келатканын жана жардамын улантарын айткан.
АКШнын мамлекеттик катчысы Энтони Блинкен өткөн аптада Орусияда Түндүк Кореянын 10 миң аскери жүргөнүн, анын 8 миңи Украина менен чектеш Курск облусуна жайгашып, жакын арада согушка салынганы жатканын билдирген.
Москва менен Пхеньян ортосунда бекемделип бараткан аскердик кызматташтык аймактык гана эмес, глобалдык коопсуздукка олуттуу коркунуч жаратарын 29-октябрда Түштүк Кореянын президенти Юн Сок Ёл белгилеген.
Орусиянын президенти Владимир Путин 24-октябрда Түндүк Кореянын аскерлери Орусияга барганы тууралуу суроого жооп бергенде аталган өлкө менен стратегиялык өнөктөштүк тууралуу келишим бар экенин белгилеп, “эмне кылсак да өзүбүз билебиз” деген.
Украинанын армиясы 6-августта Орусиянын Курск облусуна кирип барып, ал жакта жүздөгөн чарчы чакырым аймакты ушул күнгө чейин өз карамагында кармап турат.