АКШ президенти Жо Байден Украинанын коопсуздугу үчүн 425 миллион доллар бөлүнөрүн жарыялады. Бул тууралуу Ак үй билдирди.
Маалыматта айтылгандай, 16-октябрда Байден украин президенти Владимир Зеленский менен телефондон сүйлөшүп, өзүнүн кызмат мөөнөтү аяктаганга чейин Украинага жардамды көбөйтүү аракетин көрөрүн билдирди.
425 миллион долларга абадан коргонуу үчүн кошумча каражаттар, ок-дары, брондолгон техника жана башка чукул жардам жөнөтүлөт.
Андан мурдараак мамлекеттик катчы Энтони Блинкен Пентагондун запастарынан бериле турган кезектеги жардамдын ичинде NASAMS зениттик-ракеталык системалардын ок-дарысы, абадан коргонуу үчүн RIM-7 ракеталары, Stinger зениттик ракеталары, HIMARS ракеталык системаларынын ок-дарысы, кассеталык ок-дары, танкка каршы Javelin системалары жана башка техника бар экенин айткан.
2022-жылдын февралынан бери Орусиянын толук масштабдуу агрессиясына каршы согушуп келе жаткан Украинага АКШ бүгүнкү күнгө чейин аскердик жардам иретинде жалпысынан 61 миллиард доллар бөлдү.
Украин президенти Владимир Зеленский парламентке (Жогорку Рада) Орусиянын агрессиясына чекит коюуга жардам берет деген "жеңиш планын" сунуш кылды. Ага чейин долбоор АКШ президенти Жо Байденге таанышуу үчүн берилген.
Зеленский согуштун жыйынтыгы дүйнөнүн алдыдагы 10 жылдагы окуяларына таасир этерин белгиледи. Президент "кылмышкерлер коалициясына" эми Орусия гана эмес Түндүк Корея да кирип калганын айтып, Иранды Орусияга курал берип жатканы, Кытайды орус президенти Владимир Путиндин чырагына май тамызганы үчүн айыптады.
Беш пункттан турган планда Украинаны согуш аяктагычы эле НАТОго кабыл алуу, орус аймагында операцияны улантуу менен "урушту Орусияга кайтаруу", Украинага ядролук эмес стратегиялык курал жайгаштыруу, өлкөнүн стратегиялык-экономикалык дараметин арттыруу каралган.
Зеленский дагы үч жашыруун жобо бар экенин, бирок алардын мазмунун ачык айтпасын билдирди. Анын айтымында, Батыш өнөктөштөрү долбоордун деталдары менен таанышып жатат.
Украин президенти "жеңиш планы" "согушка дипломатиялык жол менен чекит коюуга" көпүрө болуп берерин белгиледи. Эмне дегенде аны ишке ашыруу Орусияны агрессиядан баш тартып, сүүйлөшүүлөр үстөлүнө отурууга түртөт.
Москва "атайын операция" деп атаган уруштун өтөлүнө чыгарын, Киев аймактык жана башка чегинүүлөргө көнсө, сүйлөшүүлөргө даярдыгын айтып келатат.
Батыш азырынча Зеленскийдин долбоорун расмий комментарийлеген жок.
Орус аскерлери шаршембиге караган түнү Украинага 136 дрон менен чабуул койду. Бул тууралуу украин куралдуу күчтөрү маалымдады.
Маалыматка караганда, абадан коргонуу бөлүктөрү Сумы, Черкассы, Кировоград, Тернополь, Херсон, Харьков, бардыгы болуп 14 облуста 51 учкучсуз учакты атып түшүрдү. Дагы 60 дрондун "локациясы жоголгону" кабарланды.
Тернополь облусунда өнөр жай комплексине урулган соккудан өрт тутанганын облус жетекчиси Вячеслав Негода билдирди. Ал эч ким жабыркабаганын кошумчалады.
Буга чейин орус Коргоо министрлиги Белгород жана Воронежде украиналык үч дрон атып түшүрүлгөнүн билдирген.
Белгороддо шейшембиде украиналык пилотсуз учактын кичи автобуска чабуул койгону маалымдалган. Губернатор Вячеслав Гладков сегиз киши, арасында өспүрүмдөр жарадар болгонун айтты.
Согуш шартында тараптардын билдирүүлөрүн оперативдүү бышыктоо мүмкүн эмес.
15-октябрдын кечинде орусиялык дрондор баш калаа Киевди бутага алган. Мэр Виталий Кличко элди коопсуз жайларга баш калкалоого чакырган. Киев облусунун аскердик администрациясынын башчысы Сергей Попко абадан коргоо күчтөрү чабуулдун мизин кайтарганын билдирди. Жабыркагандар жана кандай зыян келтирилгени айтылган жок.
Ал арада шейшембиде майданда 164 кармаш болгону, эң айыгышканы Покровск жана Харьков багыттарында катталганын украин армиясынын командачылыгы билдирди.
Европа Биримдиги Ирандын жети компаниясына жана жети аткаминерине санкция салды. Бул чара Орусияны Украинага сокку урууда колдонулган дрондор, ракеталар жана аскердик технологиялар менен камсыздагандыгы үчүн көрүлүүдө. Маалымат Еврокеңештин сайтында жарык көрдү.
Чектөөгө Saha Airlines, Mahan Air жана Iran Air, эки сатып алуучу компания жана суюк отун чыгарган эки фирма кабылды.
