Бириккен Улуттар Уюму Курск аймагынын украин аскерлери көзөмөлдөгөн бөлүгүнө гуманитардык миссиясын жайгаштырууга даяр.
"Бул үчүн уюмга Орусиядан уруксат керек", - деп билдирди "Америка авазы" БУУнун өкүлү Стефан Дюжарикке шилтеме берип.
Буга чейин Украинанын Тышкы иштер министрлиги БУУга жана Эл аралык Кызыл чырым уюмуна кайрылып, Курск облусунун украин армиясынын көзөмөлүндө турган аймактарына гуманитардык чара көрүүгө катышууну өтүнгөн.
Өз кезегинде Кызыл Чырымдын расмий өкүлү Галина Балзамова РИА Новости менен болгон маегинде уюмдун кызматкерлери Украинанын Куралдуу күчтөрү көзөмөлдөп турган аймактарга барууга даяр экенин, бирок эки тараптан тең коопсуздук кепилдиги менен гана барууга болорун билдирген.
Орус бийлиги БУУнун жана Кызым Чырым уюмунун билдирүүлөрүнө комментарий бере элек. Москва Украинанын Тышкы иштер министрлигинин билдирүүсүн чагым деп атады. Кремлдин басма сөз катчысы Дмитрий Песков эки уюм тең Киевдин билдирүүлөрүнө "ойлонуп баа" берет деген үмүтүн билдирди.
Ар кандай эсептөөлөр боюнча, Украин армиясы көзөмөлдөп турган Курск облусунун аймактарында миңге чейин жайкын тургун калышы мүмкүн.
Орусияда оппозиционер активист Виталий Иоффе киши колдуу болгонун 17-сентябрда «Север.Реалии» маркумдун жакындарынын маалыматына таянып кабарлады. Иоффе каза болгону тууралуу өз булактарына таянып RusNews көз каранды эмес басылмасы да жазды, маалыматты "Бумага" басылмасына анын кызы Елена Иоффе да тастыктады.
Окуя Санкт-Петербург шаарында болгонун алгач бийликтеги күч органдарына жакындыгы менен белгилүү Mash Телеграм-каналы маалымдап, активисттин өлүмүнө шектүү 20 жаштагы жергиликтүү тургун кармалганын, ал күнөөсүн моюнуна алганын жазган.
Иоффе Орусия Украинага кол салган күндөн тартып бул согушту айыптап келген.
2014-жылы Орусия Украинанын Крым жарым аралын аннексиялап алганда Санкт-Петербургда нааразылык акциясына чыккан. 2022-жылдан тартып башка активисттер менен бирге согушка каршы митингдерге өзү, жубайы жана кызы менен чогуу катышып келишкен.
Иоффе согушту айыптаганы үчүн «орус армиясын жаманатты кылды» деп айыпталып, камакка алынган саясий туткундарды бошотуу, аларга колдоо көрсөтүү акцияларын, пикеттерди уюштурган. Быйыл июлда оппозиционер саясатчы, жазында абакта белгисиз жагдайда каза болгон Алексей Навальныйды эскерүүгө аракет кылганда жөнөкөй кийинген күч кызматкерлери аны «кесепети болот» деп коркутушканы маалымдалган. Коркутуп-үркүтүүлөргө карабастан ал "Биз унчукпай карап тура берсек, бул акылсыздык токтобойт" деген жазуу (плакат) калтырган.
Орусия Украинага 2022-жылдын 24-февралында кол салган. Март айында бул өлкөнүн Кылмыш-жаза кодексинде орус аскерлеринин Украинанын аймагындагы кылмыштары тууралуу жазгандарды, согушту токтотууга чакыргандарды айыптоого мүмкүнчүлүк берүүчү «фейктер» жана «дискредитация» (жаманатты кылуу) тууралуу беренелер пайда болгон.
2023-жылы Орусиянын сотторунда армияны жаманатты кылуу тууралуу 2870 административдик иш каралган, жалпысынан согуш башталгандан бери мындай иштердин саны 8386ге жеткенин «Сибирь.Реалии» быйыл март айында жазган.
Украин президенти Владимир Зеленский 16-сентябрдын кечиндеги видеокайрылуусунда фронтто айыгышкан кармаш Курахово жана Покровск багыттарында уланып жатканын, Орусиянын Курск облусундагы операция планга ылайык жүргүзүлүп келатканын айтты.
Украинанын бул согуштагы Жеңиш планын даярдоо боюнча иштер 90% аяктап калганын белгилеген Зеленский пландын ар бир пунктунун аскердик, саясий, дипломатиялык жана экономикалык өңүтү такталып жатканын, зарыл кадамдар так аныкталып калганын кошумчалады:
«Бизге чыныгы жана калыс тынчтыкты жакындатуу үчүн болушунча күчтүү мүмкүнчүлүктөрдү түзө ала турган кадамдар. Ар бир кадамдын так аныктамасы бар. Ал жерде колдон келгис эч нерсе жок. 90% жазылып бүтүп калды», – деди украин президенти.
Орусиянын Коргоо министрлиги 17-сентябрга караган түнү украин тараптан учурулган 16 учкучсуз учактын мизи кайтарылганын билдирди. Дрондордун 15и Брянск облусунда, бирөө Курск облусунда атып түшүрүлгөн.
2022-жылдын 24-февралында Орусия Украинага кол салган алгачкы жылы Украина Батыштагы союздаштары жөнөткөн курал-жарактын жардамы менен орусиялык чабуулдарга туруштук берип тура алган, бирок былтыр андай жардам дээрлик токтоп, фронтто оор абал түзүлгөн. Быйыл жазында гана жардам кайра улана баштады.
17-сентябрга караган түнү Орусия Украинанын аймагына согуштук дрондордон 51ди учурганын, анын 34үн атып түшүрүүгө үлгүрүшкөнүн украин Куралдуу күчтөрүнүн Аба күчтөрү маалымдады.
Бир нече аймакта дагы 12 жанкечти дрондун локациясы аныкталбай калганы, жабыркагандар тууралуу маалымат түшпөгөнү, эки дрон кайра Орусиянын аймагына кайтканы кабарланды.
Абадан коргонуу системасы түнкүсүн жалпысынан беш облуста – Николаев, Херсон, Сумы, Полтава жана Харьков аймактарында иштеди.
Сумы облусунда, жергиликтүү аскердик администрация билдиргендей, энергетика системасынын ишканалары Shahed дрондору менен жапырт бутага алынды.
«Суу каналдары, ооруканалар жана башка эң зарыл объектилер резервдеги системаларга туташтырылды», — деп айтылды мекеменин маалыматында.