Москва менен Киев ишембиде, 14-сентябрда 103 кишиге 103 адам деген форматта туткун айырбаштады. Украинанын акыйкатчысы Дмитрий Лубинец анда мекенине негизинен согуштун биринчи күнүндө колго түшкөндөр, “Азовсталь” ишканасын кайтаргандар кайтып келгенин маалымдады. Туткундардын 82си катардагы жоокерлер менен сержанттар, калган 21и офицерлер экени айтылды.
Орусиянын Коргоо министрлигинин маалыматына караганда, айырбашталган туткундардын арасында Курск багытында колго түшкөн жоокерлер бар. Учурда алар Беларуска жеткирилип, тиешелүү жардам берилип жатат. Мекенине кайтып келгенден кийин дарылоо, реабилитациядан өткөрүлөт.
Министрлик туткун айырбаштоого Бириккен Араб Эмирлиги ортомчулук кылганын белгиледи.
Эки өлкө 13-сентябрда дагы 49-49 деген форматта туткун алмашкан.
Украин президенти Владимир Зеленский анда үйүнө кайткандардын арасында 2022-жылы декабрда Орусия аннексиялап алган Крымдагы оорулуу атасын көрүп келгени барган, орус бийлиги тыңчылыкка айыптаган крымдык татар Ление Умерова, "Азовсталь" ишканасынын коргоочулары жана Украинанын Баатыры, аскердик дарыгер Виктор Ивчук да бар экенин айткан.
"Украинская правда" кабарлагандай, туткундан бошотулгандар арасында эки жылдан бери камакта отурган, Мариуполдо колго түшүрүлгөн "Азов" полкунун 15 аскер кызматкери да бар, алардын көбү аялдар болгон.
Вашингтондо АКШнын президенти Жо Байден менен Британиянын премьер-министри Кир Стармердин жолугушуусунда Украинага алыскы аралыкка учкан ракеталарды колдонууга жол ачкан чечим кабыл алынган жок.
Ак үйдүн бул жолугушуунун жыйынтыгы тууралуу тараткан маалыматында мындай куралды колдонууга уруксат берилгени тууралуу сөз болгон эмес. Анда Кошмо Штаттары менен Британия Украинаны колдоосун, аны Орусиянын зомбулугунан коргоону улантары гана көрсөтүлгөн.
Стармер Байден менен жолугушууда Украинага карата "кандайдыр бир конкреттүү кадамдар же тактика эмес" эки өлкөнүн стратегиясы талкууланганын ырастады. Ал ошондой эле жагдайдын андан ары өнүгүшү ушул айдын аягында Бириккен Улуттар Уюмунун (БУУ) Башкы Ассамблеясынан кийин белгилүү болорун кыйытты.
Украинанын президент Владимир Зеленский бул жолугушуу тууралуу комментарий берип жатып "Путин биздин шаарларды, айылдарды өрттөп жаткан маалда "биз мунун үстүнөн иштеп жатабыз" деген сөздөрдү такай угуу оор" болорун билдирди.
Киев көптөн бери эле өнөктөштөрүнөн алыскы аралыкка учкан ракеталарды колдонууга уруксат берүүнү суранып келет.
Шаршемби күнү кечинде Киевде АКШнын мамлекеттик катчысы Энтони Блинкен жана Британиянын тышкы иштер министри Дэвид Лэмми Зеленский менен жолуккан. Анда Украинага берилген алыска атыуучу курал-жаракты колдонууга салынган тыюуну алып салуу маселеси талкууланган. Блинкен талкуулардын мазмунун Байденге жеткирерин билдирген. Ошол эле маалда ал алыска атуучу куралдарды Орусиядагы бутага колдонууга уруксат берүү эскалацияга алып келиши мүмкүн деген кооптонуулар талкууда негизги роль ойноорун белгилеген. .
The Guardian басылмасы британ өкмөтүндөгү өз булактарына таянып шаршемби кечинде Лондон Украинага Storm Shadow ракеталарын Орусиядагы буталарга каршы колдонууга уруксат бергенин кабарлаган.
Бул айда Вашингтондо Байден менен Зеленский жолугушуусу мүмкүн. Буга чейин украин президенти анда "Украинанын жеңиш планы" менен тааныштырарын маалымдаган жана бул планды ишке ашыруу АКШнын жардамына байланыштуу экенин айткан.
Орусиялык армия кошунасын түрдүү курал менен аткылап, бомбалап келет. Москва оорукана, мектеп, бала бакча, энергетика жайлары өңдүү жарандык инфраструктураны, жайкын элди бутага алганын ар дайым танат.
Киев жана эл аралык коомчулук андай соккуларды согуш кылмышы катары сыпаттайт.
АКШ президенти Жо Байден менен Британиянын премьер-министри Кир Стармер Иран менен Түндүк Кореянын Орусияны курал-жарак менен камсыздап жатканына тынчсыздануу билдиришти.
Ак үйдүн маалыматына караганда, 13-сентябрда Вашингтондогу жолугушуудан кийин тараптар Кытайдын Орусиянын коргонуу тармагындагы өнөр жай базасын колдоосуна да бушаймандыгын айтышты.
Ошол эле учурда Түндүк Кореянын лидери Ким Чен Ын Орусиянын Коргоо кеңешинин катчысы Сергей Шойгу менен жолугуп, эки өлкөнүн ортосундагы стратегиялык диалогду тереңдетүү маселелерин талкуулаганын Reuters Түндүк Кореянын KCNA маалымат агенттигине шилтеме берүү менен жазды.
Алар аймактык жана эл аралык кырдаалды, коопсуздук кызыкчылыктарын коргоо үчүн өз ара кызматташтыкты кеңейтүүнү макулдашканы кабарланды. Ким Чен Ын Түндүк Корея Орусия менен кызматташтыгын кеңейтүүнү улантарын айткан.
Reuters АКШ, Украина жана көз карандысыз талдоочулар Түндүк Корея Москвадан экономикалык жана аскердик жардамалып, анын ордуна Орусияга ракета, снаряддарды берип жатканын айтып келатканын белгилейт.
Украина Орусияда туткунда кармалып турган 49 жаранын бошотуп алганын, мекенине кайткандар арасында аскер кызматкерлери жана жайкын тургундар бар экенин 13-сентябрда өлкө президенти Владимир Зеленский билдирди.
Ал туткундан кайткандардын сүрөтүн жарыялап, орусиялыктарды туткунга алып жаткан, «айырбаштоо фондун» толуктап келаткан украин аскерлерине ыраазычылыгын айтты.
Орус тарап азырынча маалымат бере элек, бирок айрым бийликчил блогерлердин айтымында, айырбаштоо 49х49 схемасы менен жүргүзүлдү, бошотулгандар арасында кечээ жакында эле Курск облусунда украиндердин колуна түшкөн жаш аскерлер бар.
Зеленский үйүнө кайткандар арасында 2022-жылы декабрда Орусия аннексиялап алган Крымдагы оорулуу атасын көрүп келгени барган, орус бийлиги тыңчылыкка айыптаган крымдык татар Ление Умерова, "Азовсталь" ишканасынын коргоочулары жана Украинанын Баатыры, аскердик дарыгер Виктор Ивчук да бар экенин айтты.
"Украинская правда" кабарлагандай, туткундан бошотулгандар арасында эки жылдан бери камакта отурган, Мариуполдо колго түшүрүлгөн "Азов" полкунун 15 аскер кызматкери да бар, алардын көбү аялдар.