Орусиялык аскерлер Курск облусунда контрчабуулга өтүп, украин аскерлери буга чейин көзөмөлгө алган бир нече айылды кайтарып алууга жетишти. Бул тууралуу украиналык DeepState талдоо долбоору, аскердик талдоочу Роб Ли жана орусиялык бийликчил блогерлер жазышты.
DeepState долбоорунун 11-сентябрдагы маалыматында Курск облусунун бир бөлүгүн көзөмөлдөгөн украин армиясынын батыш флангындагы абалы начарлаганы айтылат.
Изилдөөчүлөр орусиялык аскерлер “брондолгон техникасын адегенде Сейм дарыясы, кийин майда сайлар аркылуу ташып, активдүү чабуулга өткөнүн” билдиришти.
Андан тышкары украин аскерлери таштап кеткен Коренево тарапта аракеттер байкалды. Снагость айылында кармаштар тутанды.
Согушту колдогон "Два майора" Телеграм-каналы чабуулду десанттык полктун жана деңиз аскерлеринин бригадалары артиллерия жана авиациянын коштоосунда ишке ашырып жатканын жазды.
"Рыбарь" маалымдагандай, орус күчтөрү Обуховка, Анапасовка жана Вишневка кыштактарын кайтарууга жетишти.
Орусиянын Коргоо министрлиги украиналык 10 жоокер туткунга алынганын билдирди.
Украинанын куралдуу күчтөрү Курск облусундагы контрчабуул тууралуу маалыматты азырынча расмий комментарийлеген жок.
Салгылашуулар жүрүп жаткан шартта майдандагы окуялардын өнүгүшүн ыкчам текшерүү дээрлик мүмкүн эмес.
6-августта Украинанын армиясы Орусиянын Курск облусунун аймагында операция баштаган. Киев анын башкы максаты өз өлкөсүн орус чабуулдарынан коргоо үчүн “буфердик зона” түзүү экенин белгилеген.
Орусиянын Мурманск облусунун губернатору Андрей Чибис “душмандын дрондору” тууралуу маалымдап, жергиликтүү тургундарга “этият болууну” эскертти. Телеграм-каналындагы маалыматта жетекчи “убактылуу чектөөлөрдү” тушүнүү менен кабыл алууга, “жердеги жана абадагы” шектүү буюмдар тууралуу полицияга кабарлап турууга үндөдү.
Baza Телеграм-каналы жазганына караганда, облуста учкучсуз учактардын сокку уруу коркунучунан улам атайын план ишке киргизилди. Маалымат боюнча, үч дрон Орусиянын Түндүк флотунун деңиз-аскердик базасы орун алган Североморск шаарында байкалган. Андан кийин Кола жарым аралында учууларга чектөө киргизилди.
Августтун аягында губернатор Чибис “дрон коркунучу” аныкталганын билдирип, бирок анын чоо-жайын айткан эмес. Ал күнү да бир нече аэропорт жабылган.
Июлдун этегинде Украинанын чалгындоо кызматы алардын дрондору бомба ташыган Ту-22М3 учактары жайгашкан Оленья аэродромуна сокку урганын билдирген. Ал учактар Украинаны бомбалоо үчүн колдонулат. Москва сокку тууралуу маалыматты бышыктаган эмес.
Аэродром украин армиясы сокку урган эң алыскы жер болуп калды.
Шейшемби күнү кечинде Филадельфияда Демократиялык жана Республикалык партиянын президенттикке талапкерлери, АКШнын вице-президенти Камала Харрис менен АКШнын мурдагы президенти Дональд Трамптын шайлоо алдындагы дебаты болуп өттү.
Талкуунун жүрүшүндө бир топ убакыт Орусиянын Украинага басып киришине арналды. Дональд Трамп Украинанын жеңишин каалайбы деген суроого жооп берүүдөн баш тартты.
"Мен согуштун токтотулушун каалайм. Мен адамдардын өмүрүн сактап калгым келет", - деп жооп берди Трамп. Ал тез арада согушту токтото аларын кайталады. Анткени ал Зеленский менен Путинди жакшы билет, алар аны сыйлашат. Трамп президент катары кызматка киришкенге чейин эле аларды согушту токтотууга көндүрө аларын белгиледи.
Ал Байдендин администрациясын "алсыз" саясаты, АКШ аскерлеринин Ооганстандан чукул чыгарылышы Путинди Украинага бастырып кирүүгө шыктандырды деп айыптады.
Камала Харрис Украинага кол салуу менен Орусия эл аралык нормаларды бузганын, өзү Киевге зарыл жардамды берүү үчүн коалиция түзүүгө өбөлгө болгонун белгиледи. "Эгер Трамп президент болгондо, Путин Европага көз салып Киевде отурмак", - деп айтты Харрис. Америкага Американын дүйнөдөгү маанилүү ролун тааныган президент керек", - деди Харрис.
АКШ Украинага орус агрессиясына туруштук берүү үчүн узак аралыкка учуучу ракеталарды колдонууга киргизилген чектөөнү алууну караштырууда.
Бул тууралуу шейшембиде АКШ президенти Жо Байден билдирди. Маалыматка караганда, Ак үйдүн администрациясы “маселенин үстүнөн иштеп жатат”. Азырынча Вашингтон алыска сокку урган андай оор куралды, өзгөчө Америкада өндүрүлгөн системаларды жаңжалдын күчөшүнөн чочулап, Орусиядагы буталарга каршы колдонууга расмий уруксат бере элек. CNN телеканалынын Байдендин администрациясындагы булактары андай саясат өзгөрүүсүз каларын билдиришти.
Ошол эле маалда 11-сентябрда Киевге бараткан АКШнын мамлекеттик катчысы Энтони Блинкен уруксат берүү ыктымалдыгын жокко чыгарбасын The Times жазды.
Башкы дипломат Украинанын “орус агрессиясына натыйжалуу жооп кайтаруу жөндөмүнө көз саларын” айтты.
Блинкен Вашингтон украин президенти Владимир Зеленскийдин сунуштарын “угуп жана карап чыгарын” кошумчалады. Зеленский америкалык ракеталарды Орусиядагы маанилүү аскердик буталарга уруу уруксатын алууга аракет көрүп келет.
Өткөн аптада украин лидери Германиядагы жыйында Батышты орус аскерлерине каршы күрөшүп жаткан өлкөнүн жөндөмүн чектөбөөгө чакырган. АКШнын коргоо министри Ллойд Остин чектөөнү алып салуу согуштун нугун олуттуу өзгөртпөйт деп эсептейт.