Украинага түнкү чабуул: 38 дрон атып түшүрүлдү
Украинанын аскер-аба күчтөрүнүн билдиришинче 10-сентябрга караганда Орусия Украинанын аймагын 46 дрон, эки ракета менен аткылады. 38 дрон атып түшүрүлдү. Абадан коргоо күчтөрү Украинанын 13 облусунда иштеген.
Черкас облусунда 14 дрон атып түшүрүлгөн. Дрондун сыныгынан эки адам жарадар болуп, аларга жардам көрсөтүлгөн.
Херсон облусундагы Понятовка айылында жүргүнчү ташыган автобуска учкучсуз учактан жардыргыч ыргытылган. Андан бир аял жараат алганын жергиликтүү бийликтен кабарлашты.
Бир жылда орус армиясында кызмат өтөө үчүн келишим түзгөндөрдүн саны алты эсеге өскөн. Бул тууралуу "Важные истории" басылмасы федералдык бюджеттин чыгашаларына таянып жазды.
Маалыматтарга караганда, өткөн жылдын биринчи жарымында 26 700 адам келишим түзгөнү үчүн бир жолку төлөм алса, быйылкы жылдын ушул мезгилинде алардын саны 166 миңге жеткен.
Келишим түзгөн аскерлердин санынын кескин өсүшү биринчи кезекте аларга төлөнүүчү акчанын көбөйүшүнө байланыштуу экени белгиленген.
Москвада Коргоо министрлиги менен келишим түзгөндөрдүн бир жолку сый акысынын өлчөмү 1,9 миллион рублга, Москва облусунда 1,7 миллионго, Ростов облусунда 1,2 миллионго, Башкырстан менен Дагестанда 500 миң рублга жеткен.
Ушуга байланыштуу апрель айынан июнга чейин эле дээрлик 93 миң киши орус армиясын менен келишим түзгөн.
Би-Би-Синин орус кызматынын жана "Медиазона" басылмасынын соңку эсебинде Орусия Украинага толук кандуу согуш ачкандан бери 61 009 орус аскери каза тапкан. Бул тек-жайы такталгандары гана. Каза тапкандардын саны мындан да көп болушу ыктымал.
Буга чейин "Медуза" жана SOTA басылмалары орусиялыктарга Украинадагы согушка чакырган СМС билдирүүлөр келип жатканын кабарлаган. Билдирүүдө "Коргоо министрлиги менен келишим түз. 800 миң рубль жана жеңилдиктер дароо берилет. 117ге чал!", - деп жазылган.
Кремлдин басма сөз катчысы Дмитрий Песков Иран Орусияга жакын аралыкка учуучу баллистикалык ракеталарды берген болушу мүмкүн деген маалыматтарды четке каккан жок. Дүйшөмбү күнкү маалымат жыйында Песков Москва менен Тегеран «бардык тармактарда, анын ичинде сезимтал чөйрөдө» кызматташтыкты өнүктүрүп жатканын жана мындан ары да улантарын билдирди.
Ирандан ракеталарды алуу тууралууу кабарларга кайрылып, «бул өңдүү маалыматтар дайым эле чындыкка дал келбесин» белгиледи.
Тегеран Москвага Украинадагы согушта пайдалануу үчүн деген ракеталарды өткөрүп бергенин булактарга таянып, The Wall Street Journal гезити жана CNN телеканалы жазган. Иран расмий түрдө маалыматты четке кагууда.
Ислам революциясынын сакчылар корпусунун жогорку өкүлү Фазлулла Нозари 9-сентябрда Батыштын андай маалыматы “психологиялык согуштун” бир бөлүгүн түзөрүн ирандык медиага айтты.
Associated Press (АР) агенттиги жекшембиде кабарлагандай, АКШ Иран Украинада колдонсун деп, жакын аралыкка учуучу баллистикалык ракетеларды Орусияга бергени тууралуу өнөктөштөрүн кабардар кылды. Агенттиктин атын атабаган маектештери канча курал, кандай жагдайда өткөрүлүп бергенинин чоо-жайын айтышкан жок.
Ошол эле маалда Ак үй Тегеран Москвага ракеталарды бергенин расмий бышыктай элек. АКШнын Улуттук коопсуздук боюнча кеңеши, андай маалымат тастыкталса, «олуттуу эскалацияны» билдирерин белгиледи.
Украинанын Тышкы иштер министрлиги маалымат каражаттары жарыялаган кабарларга тынчсыздануусун билдирип, ал чын болуп чыкса, украин-иран мамилелерине «кыйратуучу залакасын» тийгизерин белгиледи.
Согуш башталгандан бери буга чейин Иран орусиялык кардарларды жүздөгөн дрон менен камсыз кылган. Муну менен катар Тегеран Москва Украинага кол салгандан бери курал бергенин четке кагууда. Иран ал бул жаңжалда бейтараптуулукту карманарын айтууда.
Орус аскерлери 9-сентябрга караган түнү Киевге сокку урду. Шаардын аскердик администрациясынын башчысы Сергей Попконун айтымында, дрондордун бардыгы атып түшүрүлдү.
“Сентябрдын башынан бери Киевге бешинчи жолу абадан сокку урулду. Түн ичинде орус армиясы Курск аймагынан учкучсуз учактарды, болжолу менен "Shahed" дрондорун учурду”, - деп жазды Попко Телеграм каналына.
Алдын ала маалыматка караганда, башкалаада кыйроолор жана жабыркагандар катталган жок.