Украина: Жапырт ракеталык соккудан каза тапкандар бар, электр жарыгы үзгүлтүккө учурады
Украинанын бийлиги билдиргендей, 26-август эртең менен өлкө боюнча абадан айгай жарыяланды. Одесса, Днепропетров, Волын, Ивано-Франков, Запорожье жана Львов облустарынын бийликтери жарылуу болгонун кабарлашты.
Волын облусунун Луцк шаарында көп кабаттуу турак жайга зыян келтирилип, бир киши кайтыш болгонун шаар мэри Игорь Полищук билдирди.
Полтава облусунда өнөр жай объектисине зыян келтирилип, беш киши жараат алды.
Запорожьеде бир, Днепропетровскиде дагы бир киши Орусиянын таңкы чабуулунда каза тапканы кабарланды.
Жапырт соккудан кийин Украинада электр жарыгын берүүдө көйгөй жаралып, «Укрэнерго» электрди чукул өчүрдү.
Киевде бир нече район жарыксыз калды.
Орусиянын Волгоград облусуна дрондор менен чабуул коюлганын жергиликтүү бийлик билдирди.
Волгоград облустук администрациянын Телеграм-каналында: «Элан районунда 2 учкучсуз учактын сыныктарынын кулашынын натыйжасында турак жай жана имарат жабыркаган. Кырсыктан жабыркагандар жок», — деген маалымат жазылды.
Украиналык жалпыга маалымдоо каражаттары 26-августтун таңында өлкөнүн бир катар аймактары жана шаарлары Орусиянын жапырт ракеталык, дрондук аба чабуулуна кабылганын жазып жатышат.
26-август күнү таңкы саат 7:30да Украинанын Аба күчтөрү асманда алты Ту-22М3 учагы бар экенин билдирсе, ал эми саат 9:30да МиГ-31К учагы Орусиянын Савваслейка аэродромунан учуп чыкканын кабарлашты. Ошондой эле Украинанын Аскердик-аба күчтөрү бул Украина аймактарынын көбүнө каршы жүргүзүлгөн Орусиянын массалык биргелешкен ракета - дрондук чабуулу деп баалашты. Бул тууралуу "Азаттыктын" украин кызматы жазды.
Киев убактысы менен таңкы саат 8:30га карата Киев, Кировоград, Днепропетровск, Запорожье, Хмельницкий, Винница, Волын, Тернополь, Львов жана башка аймактарда абадан коргонуу системасынын иштегени жана жарылуулар болгону тууралуу маалыматтар бар.
Ошондой эле саат Украинанын Аскердик-аба күчтөрү 9:22де Орусиянын сокку уруучу дрондорунун чабуулу уланып жатканы тууралуу билдирген.
Массалык аба чабуул учурунда Полтава облусундагы өнөр жай объектисине сокку урулганын аскердик администрациянын башчысы Филипп Пронин билдирди. Бул тууралуу "Азаттыктын" украин кызматы жазды.
"Душман Полтава аймагындагы өнөр жай объектисине сокку урду. Беш адам жаракат алды", - деди ал.
Харьковдун бийлиги да аймакта орусиялык аткылоолор болгонун кабарлады.
Киев шаардык аскердик администрациясы Киевдин айланасында абадан коргонуу системасы иштеп жатканын билдирди.
Одесса облусунун башчысы Олег Кипер облустук борбордо жарылуулар болгонун айтты.
Украиналык Telegram каналдар Днепр, Запорожье, Хмельницкий, Кривой Рог жана Кропивницкий шаарларынын аймагында да жарылуулар болгонун билдиришүүдө.
Мунун алдында Украинанын аскердик бийлиги орусиялык Ту-95МС бомбалоочу учактарынын активдүүлүгү, сокку уруучу дрондордун кыймылы көбөйгөнү байкалганын жана Кара деңизде "Калибр" ракеталарын ташуучу кемелер жүргөнүн эскерткен.
"Азаттыктын" украин кызматы жазганына караганда, 26-август күнү таң эрте Орусия асманга 11 стратегиялык бомбалоочу учагын учурган.
Украиналык Телеграм-каналдары «Калибр» канаттуу ракеталарынын, болжол менен Кара деңиз акваториясынан атылганын билдиришүүдө. Ал жерде, Украина Куралдуу Күчтөрүнүн маалыматы боюнча, жалпысы 28 «Калибр» ракетасын атууга жөндөмдүү төрт орус ракеталык кемеси бар.
Ал арада Орусиянын Коргоо министрлиги түндө жана эртең менен Орусиянын бир нече аймагында Украинанын 20 учкучсуз учагы жок кылынганын маалымдады. Министрликтин кыска билдирүүсүнө ылайык, Саратов облусунда 9 дрон, Курск облусунда 3 дрон, Брянск, Белгород жана Тула облустарында экиден, Орел жана Рязань облустарында бирден дрон жок кылынган.
Бийликтердин жана ЖМКлардын билдирүүлөрү боюнча, Саратов жана Энгельс шаарларындагы турак үйлөргө эки учкучсуз учак түшкөн. Учкучсуз учактардын бири Саратовдогу бийик имаратка урунган. Бул тууралуу Саратов облусунун губернатору Роман Бусаргин билдиргенин "Азаттык" радиосунун орус кызматы кабарлады. Анын айтымында, бир аял жаракат алып, ооруканага жеткирилген. Калган жабыркагандарга жеринде жардам көрсөтүлүүдө.
Согуш шартында тараптардын билдирүүлөрүн өз алдынча тактоо мүмкүн эмес болууда.
Согуш башталгандан бери Орусия Украинага 10 миңдей ракета учурду.
Бул тууралуу Украинанын президенти Владимир Зеленский 25-августта билдирди. Анын маалыматына караганда, мындан тышкары 33 миңден ашуун бомба атылган.
"Эки жарым жыл бою кеңири масштабдуу согуш жүрүп, Орусия Украинага 10 миңге жакын ар кандай типтеги ракеталарды жана 33 миңден ашык бомбаларды атты. Биздин шаарларга чабуулду аскердик аэродромдорго сокку уруу менен токтотууга болот", — деп жазды Зеленский.