Индиянын лидери Нарендра Моди Украинага барды
Индиянын өкмөт башчысы Нарендра Моди Украинанын президенти Владимир Зеленский менен жолугары күтүлүүдө. "Блумберг" басылмасы жазгандай, коопсуздук маселелерине байланыштуу Модинин сапары бир нече саатка гана созулат. Бул Украинанын эгемен тарыхында Индиянын өкмөт башчысынын биринчи жолу Киевге барышы. Моди 22-августта Украинага барар алдында Польшада жасаган билдирүүсүндө Киев менен Москваны "болушунча тезирээк" тынчтыкка жол табууга чакырган.
"Мен дос жана өнөктөш катары аймакка тезинен тынчтык жана туруктуулук орношуна үмүттөнөм",-деди ал.
Июль айынын башында премьер Моди Москвага барып, Орусиянын президенти Владимир Путинге жолуккан. Сапардын жыйынтыгында ал Путин менен сүйлөшүүдө "абдан кызык ойлор" пайда болгонун айтып, бирок чоо-жайын ачыктаган эмес.
Зеленский анда Модинин Москвага барып, Путинге жолугушун "тынчтык орнотуу аракеттерине болуп көрбөгөндөй сокку" катары мүнөздөп, кескин сындаган.
Орусия Украинага согуш ачканы үчүн эл аралык санкцияларга кабылгандан бери Индия Кытай менен катар аны менен соода өнөктөштүгүн, айрыкча мунай сатып алууну кеңейткен өлкөлөрдүн бирине айланган. Батыштагы өнөктөштөрдөн айырмаланып, Моди Орусиянын согуш ачышын түздөн-түз айыптоодон жана Москваны сындоодон карманып турат.
Украина Орусиянын чек аралаш Курск облусунда операция баштагандан бери ага чектеш Сумы облусунда орус тараптан аткылоо да, жайкын тургундар арасында жоготуулар да азайганын 22-августта президент Владимир Зеленский билдирди.
Ал Сумы облусуна барып, абал менен жеринен таанышканын, Куралдуу күчтөрдүн башкы командачысы Александр Сырский жана жергиликтүү бийлик өкүлдөрү менен жыйын өткөргөнүн айтты.
«Курск облусунун аймагындагы дагы бир калктуу пункт украиндердин көзөмөлүндө. Биз туткун алмашуу фондун да толуктадык. Чек ара аймагында аскерлер, полиция жана өзгөчө кырдаалдар мекемесинин ортосундагы координация, атап айтканда, Курск облусунун белгиленген аймактарына гуманитардык колонна уюштуруу маселелерине көңүл бурулду», - деди ал.
Украин аскерлери Курск аймагына 6-августта кирип барышкан. Бул операциясын украин бийлиги Орусиянын чабуулдарынан коргонуш үчүн буфердик зона түзүү аракети деп атоодо.
Орусия Курск жана Белгород облустарында федералдык деңгээлдеги өзгөчө кырдаал жарыялаган. Бир нече жараны каза тапканын, 200 миңдейи эвакуация болгонун кабарлаган.
Украин президенти Зеленский 13-августтагы кайрылуусунда Курск облусунда жүздөгөн орусиялык аскер туткунга түшкөнүн билдирген. Москва бул тууралуу комментарий берген эмес.
Согуш шартында тараптардын билдирүүлөрүн өз алдынча тактоо мүмкүн эмес болууда.
Ростовдо мунай базасындагы өрттү өчүрүү учурунда 47 киши жараат алды
Орусиянын Ростов облусунун Пролетарск мунай базасындагы өрттү өчүрүү аракети төрт күндөн бери уланууда. Өрт жекшембинин түнү дрон чабуулунан кийин чыккан. Орус күчтөрү атып түшүргөн дрондун калдыгы мунай базасына тийгени айтылган.
Жабыркаган 47 кишинин баары өрт өчүрүүлөр. Алар дизел куюлган мунай сактоочу кампадагы өрттү өчүрүү учурунда жараат алышкан.
Абалы оор деген жети киши Петербургдагы ӨКМдин ооруканасына жеткирилген, эки адам реанимацияда жатат.
22-августка караган түнү базада өрттөн улам дагы бир жарылуу болгонун жергиликтүү маалымат булактары жазып жатышат. Асманга көтөрүлгөн коюу түтүн, өрт 30 чакырым алыстыктан да көрүнгөнү кабарланды.
Бейшембиде алты цистернадагы өрт өчүрүлгөнү расмий кабарлады. Жергиликтүү бийлик дрон чабуулунан кийин 20 цистернаны өрт чалганын билдиришкен. Анын ар биринин көлөмү 5000 куб метрди түзөт.
Дрон чабуулунан кийин Волгограддын аэропортунда каттамдар токтотулду
Волгограддын аэропорту аймакта дрон чабуулуна байланыштуу киргизилген чектөөлөрдөн улам аба каттамдарын кабыл алууну жана жөнөтүүнү убактылуу токтотту.
Бул тууралуу РБК аэропорттун басма сөз кызматына шилтеме берип билдирди.
Буга чейин облус бийлиги дрондордун тункү чабуулунан кийин аскердик объектилердин биринде өр чыкканын кабарлаган.
Орусиялык Телеграм-каналдар дрондор Волгограддан 50 чакырым алыстыкта жайгашкан Октябрь айылындагы "Мариновка" аскердик аэродромун бутага алганын жана ал өрттөнүп жатканын жазышты.